શેરબજારમાં દરરોજ થઈ રહેલા ભારે ઘટાડાથી રોકાણકારો ડરી ગયા છે. અગાઉ, મિડ અને સ્મોલ કેપ શેર્સમાં ઘટાડો જોવા મળી રહ્યો હતો, પરંતુ હવે હેવીવેઇટ શેર્સ એટલે કે લાર્જ કેપ શેર્સ પણ ઘટવા લાગ્યા છે, જેના કારણે માર્કેટમાં રિકવરી જોવા મળતી નથી. છેલ્લા એક મહિનાથી બજારમાં ચાલી રહેલા ઘટાડાને કારણે નવા અને જૂના બંને રોકાણકારોને ડર છે કે, આ ઘટાડો વધુ ભારે પડી શકે છે. કારણ કે મોટાભાગના પોર્ટફોલિયોમાં છેલ્લા 6 વર્ષનું વળતર કાં તો સમાપ્ત થઈ ગયું છે અથવા તો ઘણું ઓછું થઈ ગયું છે. સૌથી મોટો પ્રશ્ન એ છે કે આ ઘટાડો ક્યારે અટકશે? અને હવે જ શા માટે માર્કેટ દરરોજ તૂટી રહ્યું છે?
હવે જો આજની જ વાત કરીએ તો, નિફ્ટી50 11.25 વાગ્યે 170 પોઈન્ટ ઘટીને 23714 પર ટ્રેડ કરી રહ્યો હતો. જ્યારે સેન્સેક્સ 452 પોઈન્ટ ઘટીને 78,229 પર રહ્યો હતો. નિફ્ટી બેન્ક અને અન્ય સૂચકાંકો પણ ઘટ્યા છે. છેલ્લા એક મહિનામાં નિફ્ટી ઇન્ડેક્સમાં 1400 પોઈન્ટ અથવા 5.60 ટકાનો ઘટાડો થયો છે. એક સપ્તાહમાં 630 પોઈન્ટ અથવા 2.60 ટકાનો ઘટાડો થયો છે. જ્યારે સેન્સેક્સ 3770 પોઈન્ટ અથવા 4.60 ટકા ઘટ્યો છે. એક સપ્તાહમાં 1500 પોઈન્ટ્સ અથવા 2 ટકાનો ઘટાડો થયો છે.
27 સપ્ટેમ્બરે BSE માર્કેટ કેપ રૂ. 477 લાખ હતી, જે હવે 13 ઓક્ટોબર, 2024 સુધીમાં ઘટીને રૂ. 432 લાખ કરોડ થઈ ગઈ છે. એટલે કે આ સમયગાળા દરમિયાન રોકાણકારોના મૂલ્યાંકનમાં રૂ. 45 લાખ કરોડનો ઘટાડો થયો છે. સરળ શબ્દોમાં કહીએ તો રોકાણકારોને રૂ. 45 લાખ કરોડનું નુકસાન થયું છે.
શેરબજાર દરરોજ કેમ ઘટી રહ્યું છે? : શેરબજારમાં ઘટાડાનું મુખ્ય કારણ મોટી કંપનીઓના નબળા ત્રિમાસિક પરિણામો છે. રિલાયન્સથી લઈને એશિયન પેઈન્ટ્સ અને ઈન્ડસઈન્ડ બેંક સુધીના પરિણામોએ સૌથી વધુ ડરાવ્યા છે. બીજું મુખ્ય કારણ US 10-વર્ષના બોન્ડ યીલ્ડમાં વધારો અને ડૉલર ચાર મહિનામાં તેની સર્વોચ્ચ સપાટીએ પહોંચવાનું હતું, જે આજે CPI ફુગાવાને વેગ આપી શકે છે. ડૉલરની મજબૂતાઈથી રોકાણકારો પણ ચિંતિત છે, કારણ કે નિષ્ણાતો અપેક્ષા રાખી રહ્યા છે કે, ટ્રમ્પ રાષ્ટ્રપતિ બન્યા પછી અમેરિકાની મજબૂત આર્થિક વૃદ્ધિ અને આક્રમક વેપાર નીતિઓને કારણે ફુગાવો વધશે. ગઈ કાલે ઑક્ટોબરના રિટેલ ફુગાવાના આંકડા જાહેર કરવામાં આવ્યા હતા, જેમાં વધારો જોવા મળ્યો છે. ઓક્ટોબરમાં છૂટક ફુગાવો 6.21 ટકા પર પહોંચી ગયો છે. આ RBIની 6 ટકાની મર્યાદા કરતાં વધુ છે. 14 મહિના પછી મોંઘવારી આટલી વધી છે. વિદેશી રોકાણકારો ભારતીય શેરબજારમાંથી ઝડપથી ભાગી રહ્યા છે. ગયા મહિને શેરબજારમાંથી રૂ. 1 લાખ કરોડથી વધુની રકમ ઉપાડી લેવામાં આવી હતી. ગયા સપ્તાહે વિદેશી રોકાણકારોએ 20 હજાર કરોડ રૂપિયા પાછા ખેંચી લીધા હતા. ભારતીય બજારમાંથી નાણાં પાછા ખેંચવાનું મુખ્ય કારણ વૈશ્વિક બજારમાં તેજી છે અને ટ્રમ્પના આગમનથી રોકાણકારો વૈશ્વિક બજાર તરફ વધુ આકર્ષાઈ રહ્યા છે. ગત રાત્રે વૈશ્વિક બજારમાં પણ ઘટાડો નોંધાયો હતો. US માર્કેટથી લઈને યુરોપ, જાપાન અને ચીનના શેરબજારોમાં પણ ઘટાડો પ્રબળ રહ્યો હતો. જેના કારણે ભારતીય શેરબજાર પણ આજે દબાણમાં જોવા મળી રહ્યું છે.
શેરબજારમાં રિકવરી અંગે નિષ્ણાતો કહે છે કે, હવે ભારતીય બજારમાં ઘણું કરેક્શન આવ્યું છે. બજાર ગમે ત્યારે સૌથી નીચલું સ્તર બનાવી શકે છે અને તેમાં વધારો થઈ શકે છે. શેરબજાર બજારના ઊંચા સ્તરથી ઘણું નીચે આવી ગયું છે. નિફ્ટી 52 સપ્તાહના ઉચ્ચ સ્તરની જેમ 26,277.35 થી 23,677.60 પોઈન્ટ પર આવી ગયો છે.
નોંધ: કોઈપણ શેરમાં નાણાકીય રોકાણ કરતા પહેલા, તમે તમારા બજારના નિષ્ણાંત સલાહકારની મદદ અવશ્ય લો.
