પૂર્વ રાષ્ટ્રપતિ પ્રણવ મુખર્જીની પુત્રી શર્મિષ્ઠા મુખર્જીએ રવિવારે કોંગ્રેસ પર આકરા પ્રહારો કર્યા હતા. તેમણે કહ્યું કે, કોંગ્રેસ પાર્ટીનો વિનાશ થઇ ચુક્યો છે અને હવે તેમણે પાર્ટીને તેની આ પરિસ્થિતિ પર આત્મનિરીક્ષણ કરવાનો નિર્દેશ આપ્યો છે. તેમણે ખેદ વ્યક્ત કર્યો હતો કે, પાર્ટીની વર્તમાન પરિસ્થિતિ અને ટોચના નેતાઓમાં વિચારધારાના અભાવને કારણે કોંગ્રેસના ઘણા જૂના કાર્યકરો આજે એકલતા અનુભવી રહ્યા છે. શર્મિષ્ઠાએ એવો સવાલ પણ ઉઠાવ્યો હતો કે, તેમના પિતાના મૃત્યુ પછી કોંગ્રેસ વર્કિંગ કમિટિ (CWC)ની બેઠક શા માટે બોલાવવામાં ન આવી અને શા માટે કોઈ ઠરાવ પસાર કરવામાં ન આવ્યો.
શર્મિષ્ઠાએ કહ્યું કે પિતાના મૃત્યુ પછી CWCની કોઈ બેઠક બોલાવવામાં ન આવી ત્યારે તેમને ખોટું ખરાબ લાગ્યું. CWC કોંગ્રેસનું સૌથી મોટું નિર્ણય લેતું એકમ છે. તેમણે પૂછ્યું, ‘કોંગ્રેસે આનો જવાબ આપવો પડશે. હું તમને ફક્ત હકીકતો જ કહી શકું છું. પરંતુ હું માત્ર એટલું ઉમેરવા માંગુ છું કે, મને ખબર નથી કે તે ઇરાદાપૂર્વકની હતી કે તે સંપૂર્ણ બેદરકારીભર્યું હતું. આટલી જૂની પાર્ટીમાં શું પરંપરાઓ છે?’
શર્મિષ્ઠાએ કહ્યું, ‘જો સંસ્થાકીય યાદશક્તિનો આ વિનાશ થયો છે, જો રાહુલ ગાંધી અને તેમની આસપાસના લોકોને ખબર નથી કે કોંગ્રેસે આ પહેલાની પરિસ્થિતિઓમાં કેવી રીતે કામ કર્યું, તો તે કોંગ્રેસની અંદર એક ગંભીર અને દુઃખદ સ્થિતિ છે.’ કોંગ્રેસમાં નહેરુ-ગાંધી પરિવાર સિવાયના બહારના નેતાઓના યોગદાનને માન્યતા આપવા અંગે પૂછવામાં આવતા તેમણે કહ્યું, ‘(ભૂતપૂર્વ PM) PV નરસિમ્હા રાવ સાથે જે કરવામાં આવ્યું હતું તે આપણે ભૂલવું ન જોઈએ.’
તેમણે કહ્યું, ‘કોંગ્રેસની આખી મશીનરી, એટલે કે તેનું સોશિયલ મીડિયા, આ મુદ્દા અને અન્ય કેટલાક મુદ્દાઓ પર મને અને મારા પિતાને સતત નિશાન બનાવી રહ્યું હતું. મારા અને મારા પિતા જેવા સૌથી મોટા નેતા સામે જે પ્રકારની ભાષાનો ઉપયોગ કરવામાં આવ્યો હતો, તે દર્શાવે છે કે હકીકતમાં કોંગ્રેસનો વિનાશ થઇ ચુક્યો છે.’
શર્મિષ્ઠાએ કહ્યું કે, ‘સોશિયલ મીડિયા પર ટ્રોલ કરવાને બદલે કોંગ્રેસે ગંભીરતાથી આત્મમંથન કરવું જોઈએ કે મારા જેવી નેતા, જે કોંગ્રેસની વિચારધારામાં કટ્ટર વિશ્વાસ રાખતી હતી, તે આજે પાર્ટીથી પોતાને અલગ કેમ અનુભવી રહી છે.’
આ અગાઉ, X પરની એક પોસ્ટમાં શર્મિષ્ઠાએ કહ્યું હતું કે, ‘જ્યારે બાબાનું નિધન થયું ત્યારે કોંગ્રેસે શોક વ્યક્ત કરવા માટે CWCની બેઠક બોલાવવાની પણ તસ્દી લીધી ન હતી. એક વરિષ્ઠ નેતાએ મને કહ્યું કે, આ રાષ્ટ્રપતિઓ માટે કરવામાં આવતું નથી. આ સંપૂર્ણ બકવાસ છે, કારણ કે પાછળથી મને બાબાની ડાયરીમાંથી ખબર પડી કે, KR નારાયણનના નિધન પર CWCને બોલાવવામાં આવી હતી અને શોક સંદેશ બાબાએ પોતે તૈયાર કર્યો હતો.’
પૂર્વ PM મનમોહન સિંહના સ્મારકની સ્થાપનાને લઈને ઉભા થયેલા વિવાદ પર શર્મિષ્ઠાએ કહ્યું કે, તે આ વિવાદમાં નહીં પડે, કારણ કે તે હવે કોંગ્રેસનો ભાગ નથી અને રાજકારણ છોડી દીધું છે. જો કે, તેમણે મનમોહન સિંહ માટે સ્મારક બનાવવાની હિમાયત કરી અને કહ્યું કે દેશનો સર્વોચ્ચ નાગરિક પુરસ્કાર ભારત રત્ન પણ પૂર્વ PM મનમોહન સિંહને મરણોત્તર આપવો જોઈએ. તેમણે કહ્યું, ‘હું આ વિશે કંઈપણ કહેવા માંગતી નથી, હું હવે કોંગ્રેસ સાથે જોડાયેલી નથી, મેં રાજકારણ છોડી દીધું છે. રાહુલ ગાંધીએ શું કહ્યું તે કોંગ્રેસે સ્પષ્ટ કરવાની જરૂર છે.’
મુખર્જીએ કહ્યું, ‘મને લાગે છે કે મનમોહન સિંહનું સ્મારક બનાવવાની માંગ સંપૂર્ણપણે વાજબી છે. તેઓ ભારતમાં આર્થિક સુધારાના આર્કિટેક્ટ હતા, તેઓ ભારતની વિકાસગાથાના પિતા હતા, તેઓ બે વખત PM રહ્યા હતા. તેથી તેમના સન્માનમાં સ્મારક બનાવવાની માંગ સંપૂર્ણપણે વાજબી છે. આ ઉપરાંત, ભારતના સામાન્ય નાગરિકો વતી, હું તેમના માટે ભારત રત્નની માંગ કરું છું, તેઓ તેના માટે સંપૂર્ણ હકદાર છે.’ અહીં તમને જણાવી દઈએ કે, મનમોહન સિંહનું 26 ડિસેમ્બરે ઓલ ઈન્ડિયા ઈન્સ્ટિટ્યૂટ ઓફ મેડિકલ સાયન્સ (AIIMS)માં અવસાન થયું હતું. તેઓ 92 વર્ષના હતા. શનિવારે તેમના અંતિમ સંસ્કાર કરવામાં આવ્યા હતા.
