ઉત્તર પ્રદેશના પ્રયાગરાજમાં જુના અખાડામાં તાજેતરમાં સંન્યાસી બનવા માટે જોડાયેલી ૧૩ વર્ષની સગીર છોકરીને નિયમોની વિરુદ્ધ ગણીને અખાડામાંથી હાંકી કાઢવામાં આવી છે. આ સાથે, છોકરીને દીક્ષા આપનાર તેના ગુરુ મહંત કૌશલ ગિરિને પણ સાત વર્ષ માટે અખાડામાંથી હાંકી કાઢવામાં આવ્યા છે.
શનિવારે માહિતી આપતાં, જુના અખાડાના આંતરરાષ્ટ્રીય પ્રવક્તા શ્રીમહંત નારાયણ ગિરીએ જણાવ્યું હતું કે, અખાડાના નિયમો મુજબ, 25 વર્ષથી ઓછી ઉંમરની મહિલાઓને પ્રવેશ આપી શકાતો નથી. શુક્રવારે યોજાયેલી અખાડાની સામાન્ય સભામાં આ મુદ્દા પર ચર્ચા થઈ હતી. સર્વાનુમતે નિર્ણય લેવામાં આવ્યો કે, છોકરીનો પ્રવેશ રદ કરવામાં આવશે અને મહંત કૌશલ ગિરિ મહારાજને સગીર છોકરીને પ્રવેશ આપવા બદલ સાત વર્ષ માટે હાંકી કાઢવામાં આવશે.
જ્યારે, નારાયણ ગિરીએ કહ્યું કે, સગીર છોકરીને સંપૂર્ણ સન્માન સાથે તેના માતાપિતાને સોંપવામાં આવી છે. જુના અખાડાના નિયમો અનુસાર, ફક્ત 25 વર્ષ કે તેથી વધુ ઉંમરની મહિલાઓને જ અખાડામાં સામેલ કરી શકાય છે. જોકે, જો માતા-પિતા સગીર છોકરાને અખાડામાં સમર્પિત કરે છે, તો નિયમો અનુસાર તેને અખાડામાં સામેલ કરી શકાય છે.
શુક્રવારે, જુના અખાડાના આશ્રયદાતા મહંત હરિ ગિરિ, પ્રમુખ શ્રીમહંત પ્રેમ ગિરિ અને અન્ય વરિષ્ઠ સંતોએ બેઠકમાં હાજરી આપી હતી. બેઠક દરમિયાન, સંતોએ મહંત કૌશલ ગિરિ પર નારાજગી વ્યક્ત કરી, જેમણે અખાડાને જાણ કર્યા વિના એક સગીર છોકરીને દીક્ષા આપી.
છોકરીની માતા રીમા સિંહે જણાવ્યું કે, મહંત કૌશલ ગિરિ મહારાજ છેલ્લા ત્રણ વર્ષથી ભાગવત કથા સંભળાવવા માટે તેમના ગામમાં આવી રહ્યા હતા. ત્યાં જ તેમની ૧૩ વર્ષની પુત્રી રેખા સિંહ (હવે ગૌરી ગિરી)એ ગુરુજી પાસેથી દીક્ષા લીધી. તેમણે કહ્યું કે, તેમની પુત્રીએ સાંસારિક ઇચ્છાઓનો ત્યાગ કરવાની ઇચ્છા વ્યક્ત કરી અને સાધ્વી બનવાની વાત કરી. તેને ભગવાનની ઇચ્છા માનીને, તેમણે પોતાની પુત્રીને જુના અખાડાને સોંપી દીધી. મહંત કૌશલ ગિરિએ રેખાને દીક્ષા આપી અને તેમનું નવું નામ ‘ગૌરી ગિરિ’ રાખ્યું. હવે અખાડાએ આ સમગ્ર મામલે કડક વલણ અપનાવ્યું છે અને મહંત અને સગીર છોકરી બંનેને હાંકી કાઢ્યા છે.
