કલમ 498a બોમ્બે હાઈકોર્ટ, એક કેસની સુનાવણી કરતી વખતે, બોમ્બે હાઈકોર્ટે ભારપૂર્વક જણાવ્યું છે કે, જો કોઈ પત્ની ફક્ત તેના પતિના વર્તનને સુધારવા માટે ખોટો કેસ દાખલ કરે છે, તો તેને પણ ક્રૂરતા ગણવામાં આવશે. કોર્ટે લગ્નના બંધન પર, પરસ્પર વિશ્વાસ પર, શ્રદ્ધા પર એક મોટી ટિપ્પણી કરી છે. કેસની સુનાવણી દરમિયાન ચિંતા વ્યક્ત કરવામાં આવી હતી કે, આ રીતે કોઈની સામે ખોટો કેસ દાખલ કરવો ક્રૂરતા છે.
જસ્ટિસ ગિરીશ કુલકર્ણી અને જસ્ટિસ અદ્વૈત સેઠનાની બેન્ચે કહ્યું કે, અમને સ્પષ્ટપણે દેખાય છે કે, પતિ અને તેના પરિવારના સભ્યોને ખોટા ફોજદારી કેસોમાં ફસાવવાનો પ્રયાસ કરવામાં આવ્યો છે. પત્ની તેના પતિના વર્તનમાં સુધારો કરવા માંગતી હતી તેથી જ પતિને આવા ગંભીર આરોપોનો સામનો કરવો પડી રહ્યો છે. વ્યક્તિએ એ સમજવાની જરૂર છે કે, જ્યારે પરસ્પર વિશ્વાસ, આદર અને સુમેળભર્યા સંબંધોની વાત આવે છે, ત્યારે આવી બાબતો માટે કોઈ સ્થાન નથી.
સુનાવણી દરમિયાન એવું પણ કહેવામાં આવ્યું હતું કે, જ્યારે પતિ કે પત્ની ખોટો કેસ દાખલ કરવાનો આશરો લે છે, ત્યારે લગ્નની પવિત્રતા જાળવવી મુશ્કેલ બની જાય છે. જો પતિ કે પત્ની ખોટા કેસ દ્વારા એકબીજા સામે ખોટા કેસ દાખલ કરે છે, તો તેવી સ્થિતિમાં લગ્નની પવિત્રતા જાળવી શકાતી નથી. આને ક્રૂરતાનું એક સ્વરૂપ ગણવામાં આવશે અને તે છૂટાછેડા માટેનું કારણ પણ બની શકે છે.
માહિતી માટે, અહીં અમે તમને જણાવી દઈએ કે, આ કપલે માર્ચ 2006માં લગ્ન કર્યા હતા, પરંતુ થોડા જ મહિનાઓ પછી તેઓ અલગ થઈ ગયા. ત્યારપછી પત્નીએ પતિ પર કલમ 498A હેઠળ ક્રૂરતાનો આરોપ લગાવ્યો, પરંતુ આ કેસને પહેલા ટ્રાયલ કોર્ટ દ્વારા અને પછી અપીલ કોર્ટે ફગાવી દીધો. હવે પતિને બંને કોર્ટમાંથી રાહત મળી ગઈ, પરંતુ પત્ની પોતાના આરોપો સાથે હાઈકોર્ટ ગઈ. પરંતુ સુનાવણી દરમિયાન, ફેમિલી કોર્ટને જાણવા મળ્યું કે, પતિને આ મામલે કોઈ પણ પ્રકારની નોટિસ જ મળી નથી અને પત્નીએ પણ તે કેસની કોઈ વિગતો શેર કરી નથી.
કોર્ટે એ પણ શોધી કાઢ્યું કે, પત્ની ખરેખર ઇચ્છતી નહોતી કે તેના પતિને કોઈ પણ બાબતમાં સજા થાય; તે ફક્ત તેના પતિના વર્તનમાં સુધારો કરવા માંગતી હતી. પરંતુ કોર્ટનું માનવું હતું કે, આમ કરીને પત્નીએ કાયદાનો દુરુપયોગ કર્યો છે અને આ કારણોસર તેને છૂટાછેડા આપવામાં આવ્યા છે. હાઇકોર્ટે ફેમિલી કોર્ટના એ તારણને સ્વીકાર્યું છે કે, પત્નીના કૃત્યોને ક્રૂરતા તરીકે ગણવામાં આવે. આમ તો આજે પતિના પક્ષમાં ચુકાદો આવ્યો છે, પરંતુ રવિવારે સુપ્રીમ કોર્ટે ભરણપોષણ અંગે પત્નીના પક્ષમાં મોટો ચુકાદો આપ્યો હતો.
