સૈફ અલી ખાન પર થયેલા હુમલા પછી તેણે પહેલીવાર મીડિયા સાથે વાત કરી છે. તેનો પહેલો ઇન્ટરવ્યુ બહાર આવ્યો છે. તેણે કહ્યું કે તે રાત્રે બરાબર શું થયું હતું, કરીના કપૂર ક્યાં હતી, તૈમૂર અને જેહ ક્યાં હતા. તે હોસ્પિટલ કેવી રીતે પહોંચ્યો?
એક અંગ્રેજી અખબારને આપેલા ઈન્ટરવ્યુમાં સૈફે કહ્યું, કરીના રાત્રિભોજન માટે બહાર ગઈ હતી અને સવારે મારે થોડું કામ હતું, તેથી હું ઘરે જ રહ્યો. તે પાછી આવી. અમે થોડી વાર વાતો કરી અને પછી સૂઈ ગયા. થોડી વાર પછી ઘરની હેલ્પર દોડતી આવી અને મને કહ્યું કે, કોઈ ઘરમાં ઘૂસી ગયું છે. તેણે કહ્યું કે, જેહના રૂમમાં એક માણસ છે અને તે પૈસાની માંગણી કરી રહ્યો છે. તે સમયે રાત્રિના લગભગ બે વાગ્યા હતા.
હું ગુસ્સામાં આવી ગયો. હું રૂમમાં પહોંચ્યો અને જોયું તો એક માણસ ઊભો હતો. મને લાગ્યું કે તેના બંને હાથમાં ડંડાઓ છે. પણ એ હેક્સા બ્લેડ હતી. તેના ચહેરા પર માસ્ક અને બંને હાથમાં ચાકુ હતા. આ એક ભયાનક દ્રશ્ય હતું. મને ખબર નથી કે તે સમયે મારી સાથે શું થયું હતું પણ મેં જઈને તેને પકડી લીધો. અમે બંને લડી રહ્યા હતા. તે મારી પીઠ પર હુમલો કરી રહ્યો હતો.’
સૈફ કહે છે કે, તે સમયે તેને ખ્યાલ નહોતો રહ્યો કે તેના પર ચાકુથી હુમલો થઈ રહ્યો છે. તેણે આગળ કહ્યું, ‘તે મારી ગરદન પર હુમલો કરી રહ્યો હતો અને હું તેને મારા હાથથી રોકવાનો પ્રયાસ કરી રહ્યો હતો. મારા હાથ પર ઈજાઓ થઇ હતી. હું તેની સાથે લડી રહ્યો હતો પણ થોડા સમય પછી હું તેને સંભાળી શક્યો નહીં, કારણ કે તે બંને ચાકુઓથી હુમલો કરી રહ્યો હતો. બીજી બાજુ, હું નિઃશસ્ત્ર હતો. હું ફક્ત પ્રાર્થના કરી રહ્યો હતો કે કોઈ તેને મારાથી દૂર કરી લે. પછી અમારી ઘરકામ કરતી ગીતાએ તેને મારાથી દૂર ખેંચી લીધો. અમે બંને નીચે પડી ગયા અને દરવાજો બંધ કરી દીધો. આ સમયે હું લોહીથી લથપથ હતો અને મારો જમણો પગ અનુભવી શકતો ન હતો. આનું કારણ એ હતું કે મારી કરોડરજ્જુમાં ઈજા થઈ હતી. પણ મને ત્યારે આ સમજાયું નહીં. પછી મને એવું લાગ્યું કે જાણે મારા પગમાં ચાકુ મારવામાં આવ્યું હોય. હું તે માણસ સાથે લડવા માટે કંઈક શોધવા ઉપર ગયો. બીજી બાજુ, કરીના જેહને રૂમમાંથી બહાર કાઢીને તૈમૂરના રૂમમાં પહોંચી. મને યાદ છે કે લડાઈ દરમિયાન કરીના કહી રહી હતી, ‘બાળકને બહાર કાઢો.’
સૈફે કહ્યું કે ઘરની મદદનીશ ગીતાએ બહારથી દરવાજો બંધ કરી દીધો હતો, તેથી તેમને લાગ્યું કે હુમલાખોર અંદરથી બંધ છે. પણ તે જે રીતે આવ્યો હતો તે જ રીતે ભાગી ગયો. તે ડ્રેઇનપાઇપ દ્વારા બાળકોના બાથરૂમમાં આવ્યો હતો. સૈફે આગળ કહ્યું, મને નથી લાગતું કે હુમલાખોરને ખબર હતી કે હું ક્યાં છું. અમે બધા નીચે આવ્યા. આ એક સંપૂર્ણ ફિલ્મી દ્રશ્ય હતું. હું લોહીથી લથપથ હતો અને અમે દિવાલ પરથી બે તલવારો નીચે ઉતારી. તૈમૂરે આ જોયું, હું લોહીથી લથપથ હતો અને ઘરનો નોકર હરિ બંને તલવારો પકડીને ઊભો હતો. અમે કહ્યું કે ચાલો તેને પકડી લઈએ અને કરીનાએ કહ્યું બહાર આવ, તને હોસ્પિટલ લઈ જવાની જરૂર છે. એક કરતાં વધુ હુમલાખોર હોઈ શકે છે અને આપણે જેહને બહાર કાઢવાની જરૂર છે. અમે બહાર આવ્યા.
કરીના રિક્ષા કે કેબ મંગાવી રહી હતી. મેં કહ્યું કે મને દુખાવો થઈ રહ્યો છે. મારી પીઠમાં કંઈક ગડબડ લાગી રહી છે. કરીનાએ કહ્યું, ‘તું હોસ્પિટલ જા અને હું મારી બહેનના ઘરે જઈશ’. કરીના સતત ફોન કરી રહી હતી પણ કોઈ ઉપાડતું નહોતું. અમે બંનેએ એકબીજા સામે જોયું અને મેં કહ્યું કે હું ઠીક છું, હું મરવાનો નથી.
તૈમૂરે પણ મને પૂછ્યું કે, શું હું મરી જઈશ. મેં જવાબ આપ્યો, ‘ના’.
સૈફ યાદ કરે છે કે તૈમૂર સંપૂર્ણ નિયંત્રણમાં હતો. તેણે સૈફને કહ્યું કે, તે તેને હોસ્પિટલ લઈ જશે. સૈફે આગળ કહ્યું, મારી પત્નીએ તૈમૂરને મારી સાથે મોકલ્યો, કારણ કે તે જાણતી હતી કે તે મારા માટે શું કરી શકે છે. તે સમયે કદાચ તે સારી વસ્તુ ન હતી, પણ મને તે સારું લાગ્યું અને મેં વિચાર્યું કે જો કંઈક ખોટું થાય તો પણ, હું ઈચ્છીશ કે તૈમૂર મારી સાથે રહે. તો હું, તૈમૂર અને હરી રિક્ષામાં હોસ્પિટલ ગયા.
રિક્ષાચાલકે લોહી જોયું અને સમજી ગયો કે બધું બરાબર નથી. તેણે જોયું કે અમે લોકો સારા ઘરના છીએ. મને ખબર નથી કે તેને આવું કેમ લાગ્યું. પણ તે અદ્ભુત હતો, તેણે શોર્ટકટ લીધો અને અમને લીલાવતી હોસ્પિટલ લઈ ગયો.
હોસ્પિટલ પહોંચતા જ ડોક્ટરોને ખ્યાલ આવ્યો કે મામલો ખૂબ જ ગંભીર છે. ચાકુનો ત્રણથી ચાર ઇંચનો ભાગ સૈફના ખભાની પાછળ ઘૂસી ગયો હતો. કરોડરજ્જુમાંથી પ્રવાહી નીકળવા લાગ્યું હતું. તેના કારણે, સૈફ તેના પગ અનુભવી શક્યો નહીં. તેમણે પોતાની સર્જરી વિશે જણાવ્યું, તે એક મોટી સર્જરી હતી અને ડોક્ટરોએ ખૂબ સારું કામ કર્યું. તેને છ કલાક લાગ્યા. કરોડરજ્જુ પર કામ કરવામાં અઢી કલાક લાગ્યા. મને પાંચ કલાક સુધી એનેસ્થેસિયાની અસર રહી હતી.
સૈફે વાતચીતના અંતે કહ્યું કે તૈમૂરને લાગે છે કે હુમલાખોરને માફ કરી દેવો જોઈએ. તે કહે છે કે તેને ભૂખ લાગી હતી. જોકે, સૈફ કહે છે કે તે પણ હુમલાખોરને માફ કરી દેત. તેને પણ તેના માટે ખરાબ લાગે છે, પણ પછી તેને યાદ આવે છે કે તે માણસે તેને મારી નાખવાનો પ્રયાસ કર્યો હતો. તેના કારણે તેમને હુમલાખોર માટે ખરાબ લાગતું નથી. અહીં તમને જણાવી દઈએ કે, સૈફને પાંચ દિવસ પછી હોસ્પિટલમાંથી રજા આપવામાં આવી હતી અને ત્યાર પછીથી તે સ્વસ્થ થઈ રહ્યો છે.
