હરિયાણાના હિસારની રહેવાસી ભૂતપૂર્વ વર્લ્ડ ચેમ્પિયન બોક્સર સ્વીટી બોરા અને તેના પતિ દીપક હુડ્ડા વચ્ચેનો વિવાદ વધી રહ્યો છે. પોલીસમાં એકબીજા વિરુદ્ધ કેસ દાખલ કર્યા પછી બંને વચ્ચે તણાવ વધુ વધી ગયો છે. ગઈકાલે પોલીસ સ્ટેશનમાં સ્વીટી બોરાનો તેના પતિ અને ભારતીય કબડ્ડી ટીમના ભૂતપૂર્વ કેપ્ટન દીપક હુડા સાથે મારપીટનો વીડિયો વાયરલ થયા પછી આજે સ્વીટી બોરાએ તેના પતિ દીપક હુડા પર ગંભીર આરોપો લગાવ્યા છે. સ્વીટીએ કહ્યું છે કે, દીપક હુડ્ડા છોકરાઓમાં રસ ધરાવે છે. તેણે કહ્યું, ‘મને આ બધી વાતો પછી ખબર પડી.’
સ્વીટી લાઈવ આવી અને કહ્યું કે, જો તે આટલી ખરાબ છે તો તેનો પતિ તેને છૂટાછેડા કેમ નથી આપતો. સ્વીટીએ કહ્યું, ‘હું ફક્ત તેની પાસેથી છૂટાછેડા માંગી રહી છું. જો કોઈ વ્યક્તિ આટલો ખરાબ છે તો કોઈ તેની સાથે કેમ રહેવા માંગશે?’ સ્વીટીએ કહ્યું કે, કોઈ વ્યક્તિ ફક્ત ત્યારે જ સાથે રહેવા માંગે છે જો તે સારો હોય. મેં કોઈ મિલકત કે પૈસા માંગ્યા નથી. ત્યાં સુધી કે, તેણે મારા જે પૈસા ખાઈ લીધા છે, તે પણ હું નથી માંગતી. મેં તેને ફક્ત એટલું જ કહ્યું કે મને છૂટાછેડા આપી દે; મને બીજું કંઈ જોઈતું નથી.’
મહિલા પોલીસ સ્ટેશનમાં પતિ દીપક હુડ્ડા સાથે મારપીટ થઈ રહી હોવાના વીડિયો અંગે સ્પષ્ટતા આપતા સ્વીટીએ કહ્યું કે, વીડિયોની શરૂઆત અને અંતનો ભાગ ગાયબ છે. તે ભાગમાં દીપક તેને ગંદી ગાળો આપી રહ્યો હતો. મને જાણી જોઈને ખરાબ રીતે રજૂ કરવામાં આવી રહી છે, હકીકત એ છે કે, દીપક હુડ્ડા જ મને માર મારતો હતો. પોલીસ સ્ટેશનનો વીડિયો જાહેર થયા પછી સ્વીટી બોરાએ કહ્યું કે, તે દર્શાવે છે કે હિસારના SP આ કેસમાં દીપક સાથે મળી ગયા છે. બંનેને ફાંસીની સજા થવી જોઈએ. પોલીસ સ્ટેશનમાં જે કંઈ બન્યું તેનો આખો વીડિયો જાહેર થવો જોઈએ, પરંતુ હિસાર SPએ પોલીસ સ્ટેશનના વીડિયોને વિકૃત રીતે રજૂ કર્યો છે.
સ્વીટી કહે છે કે તે વીડિયોમાં ઘટના બની તે પહેલા અને તે દરમિયાન થયેલી વાતચીત બતાવવામાં આવી નથી. તેણે જણાવ્યું કે દીપકે FIRમાં તેના પિતા અને મામાના નામ પણ લખાવ્યા છે, જ્યારે વીડિયોમાં સ્પષ્ટપણે દેખાય છે કે તેના પિતા અને મામા દીપક પાસે ગયા પણ ન હતા. સ્વીટીએ કહ્યું કે, દીપકે ખોટો મેડિકલ રિપોર્ટ કરાવ્યો અને FIRમાં તેના મામા અને પિતાના નામ લખાવ્યા.
સ્વીટી અને દીપકના લગ્ન 3 વર્ષ પહેલા થયા હતા. સ્વીટીએ તેના પતિ દીપક વિરુદ્ધ દહેજ માટે ત્રાસ આપવાનો આરોપ લગાવીને FIR નોંધાવી હતી. તેણે કહ્યું કે લગ્નમાં 1 કરોડ રૂપિયા અને ફોર્ચ્યુનર કાર આપવા છતાં, ઓછા દહેજ માટે તેને ત્રાસ આપવામાં આવતો હતો. જ્યારે, દીપકે સ્વીટી અને તેના પરિવાર પર તેની મિલકત હડપ કરવાનો અને તેને જાનથી મારી નાખવાની ધમકી આપવાનો આરોપ પણ લગાવ્યો હતો. દીપકે કહ્યું કે, સ્વીટી જ્યારે તે સૂતો હતો ત્યારે તેનું માથું તોડી નાખ્યું હતું અને તેના પર ચાકુથી હુમલો કર્યો. બંનેની ફરિયાદ પર હિસાર અને રોહતકમાં ક્રોસ કેસ નોંધવામાં આવ્યા છે.