રાજ્યમાં થોડા દિવસ પહેલા કમોસમી વરસાદના રાઉન્ડ પછી વાતાવરણમાં ઠંડક છવાઈ હતી, પણ હવે ફરીથી બફારો અને ઉકળાટ સાથે ગરમીનો મારો શરૂ થયો છે. હાલમાં મે મહિનાનો મધ્ય સમય ચાલી રહ્યો છે અને આવી પરિસ્થિતિ વચ્ચે આગામી દિવસોમાં પ્રી મોન્સૂન એક્ટિવિટીની શરૂઆત થવાની સંભાવના છે.
હવામાન નિષ્ણાત અંબાલાલ પટેલે આ સંદર્ભે મહત્વની આગાહી કરી છે. તેમના જણાવ્યા મુજબ, બંગાળની ખાડી અને અરબી સમુદ્રમાં સર્જાતી હવામાની પ્રવૃત્તિઓના આધારે એવી શક્યતા છે કે ચોમાસાની રેખા ધીમે ધીમે આગળ વધી રહી છે અને 8 જૂન આસપાસ ગુજરાતમાં ચોમાસું સક્રિય થઈ શકે છે.
તેમણે વધુમાં જણાવ્યું કે આગામી 24 મે સુધી રાજ્યના અનેક વિસ્તારોમાં ગાજવીજ, આંધી-પવન અને કમોસમી વરસાદની શક્યતા છે. 25 મે બાદ રાજ્યમાં ફરીથી ગરમી જોર પકડે તેવી શક્યતા છે, જેમાં તાપમાન 42°C થી 44°C સુધી પહોંચી શકે છે.
અંબાલાલ પટેલે લોકોને ખાસ કરીને વૃદ્ધો અને બાળકોને તીવ્ર ગરમીથી બચવાની સલાહ આપી છે. સાથે જ ખેડૂતોએ પણ સાવચેત રહેવું જરૂરી છે કારણ કે હાલનો કમોસમી વરસાદ પાકને નુકસાન પહોંચાડી શકે છે. જેમણે વાવણી માટે જમીન તૈયાર કરી છે, તેમણે પાણી ભરાવા સામે જાગૃતિ રાખવી જરૂરી છે. આગામી દિવસોમાં હવામાન પલટા ખેડૂતો અને સામાન્ય જનતા બંને માટે મહત્વપૂર્ણ છે અને તાત્કાલિક પગલાં લેવાની જરૂર છે.