લોકસભાના બજેટ સત્રનો બીજો હાફ સોમવાર 9 માર્ચથી શરૂ થવાનો છે. બીજા હાફના પહેલા દિવસનો એજન્ડા સામે આવી ગયો છે. બજેટ સત્રના પહેલા જ દિવસે સ્પીકર ઓમ બિરલાને તેમના પદ પરથી હટાવવા માટેનો પ્રસ્તાવ લોકસભામાં રજૂ કરવામાં આવશે. આ પ્રસ્તાવની નોટિસ કોંગ્રેસના સાંસદો ડૉ. મોહમ્મદ જાવેદ, કે. સુરેશ અને ડૉ. મલ્લુ રવિ તરફથી આપવામાં આવ્યો છે.
કોંગ્રેસ સાંસદો દ્વારા સ્પીકરને પદ પરથી હટાવવાના પ્રસ્તાવની નોટિસમાં વિપક્ષી મહિલા સાંસદો પર ગેરવાજબી આરોપો લગાવવાથી લઈને સમગ્ર સત્ર માટે વિપક્ષી સાંસદોને સસ્પેન્ડ કરવા સુધીના વિવિધ મુદ્દાઓનો ઉલ્લેખ કરવામાં આવ્યો છે. આ પ્રસ્તાવમાં વિપક્ષી સભ્યો તરફથી સ્પીકરના વર્તન પર પ્રશ્નાર્થ લગાવતા શાસક પક્ષના સભ્યોની તરફેણ કરવાનો આરોપ પણ લગાવવામાં આવ્યો છે.
નોટિસમાં આરોપ લગાવવામાં આવ્યો છે કે, સ્પીકર શાસક પક્ષના સાંસદોને અયોગ્ય વર્તન માટે ટોકતા નથી. સ્પીકર પર એવો પણ આરોપ લગાવવામાં આવ્યો છે કે, વિવાદાસ્પદ મુદ્દાઓ પર તેઓ શાસક પક્ષનો સાથ આપે છે. 9 માર્ચની કાર્યવાહીમાં જે એજન્ડા સામે આવ્યો છે, તેમાં રૂટિનના મુદ્દાઓ સિવાય માત્ર એક આ પ્રસ્તાવનો ઉલ્લેખ છે. પહેલા દિવસના એજન્ડામાં સરકાર તરફથી કોઈ કાયદાકીય કાર્ય નથી.
લોકસભાના વર્તમાન સભ્ય ડૉ. રિકી એન્ડ્રૂ જે. સિંગકોનનું તાજેતરમાં અવસાન થયું હતું. 9 માર્ચે લોકસભામાં તેમને શ્રદ્ધાંજલિ આપવામાં આવશે. નોંધનીય છે કે બજેટ સત્રનો પહેલો હાફ તોફાની રહ્યો હતો. હોબાળાને કારણે ગૃહની કાર્યવાહી ઘણા દિવસો સુધી ખોરવાઈ હતી. સ્પીકરે કેટલાક વિપક્ષી સાંસદોને અમર્યાદિત વર્તન બદલ સત્રના બાકીના સમય માટે સસ્પેન્ડ કર્યા હતા.
વિપક્ષી કોંગ્રેસના સાંસદોએ લોકસભા સચિવાલયમાં સ્પીકરને તેમના પદ પરથી હટાવવા માટે પ્રસ્તાવની નોટિસ રજૂ કરી હતી. હવે, આ પ્રસ્તાવ 9 માર્ચે ગૃહમાં રજૂ થવાનો છે, જેને લઈને શાસક NDAના નેતૃત્વ હેઠળના ભાજપ અને વિપક્ષી કોંગ્રેસ બંનેએ તેમના સભ્યોને 3 લાઇનનો વ્હીપ જાહેર કરીને તે દિવસે ગૃહમાં હાજર રહેવાનું કહ્યું છે.
