હાલમાં જ ઘણા ભારતીય રાજ્યોમાં ચૂંટણીઓ યોજાઈ ગઈ છે. આ સંદર્ભમાં, વિદેશથી રસપ્રદ સમાચાર સામે આવ્યા છે. હા, તમને એ જાણીને આશ્ચર્ય થશે કે, એક ભારતીય, વિદેશી નાગરિક હોવા છતાં, UKમાં સંસદ સભ્ય બન્યો છે. આ વાર્તા તમિલનાડુમાં જન્મેલા મણિવન્નનની છે. એક નૉન-બાઈનરી ટ્રાન્સજેન્ડર ભારતીય હોવા છતાં, તે સ્કોટિશ સંસદ (MSP) માટે ચૂંટાયેલા પ્રથમ વ્યક્તિ બન્યા છે. રસપ્રદ વાત એ છે કે, તે એક વિદેશી નાગરિક છે અને UKમાં રહેવા માટે તેમની પાસે કાયમી વિઝા પણ નથી.
ભૂતપૂર્વ PHD વિદ્યાર્થી Q મણિવન્નન શુક્રવારે સ્કોટિશ ગ્રીન્સ પાર્ટી માટે એડિનબર્ગ અને લોથિયન્સ ઇસ્ટ બેઠક જીતી ગયા. તેમણે તેમના સમર્થકોને કહ્યું, ‘મારું નામ ડૉ. Q મણિવન્નન છે. હું એક ટ્રાન્સજેન્ડર તમિલ ઇમિગ્રન્ટ છું, અને મારુ ઉપનામ તેઓ અથવા તેમને છે.’ તેઓ અથવા તેમને નો અર્થ નૉન-બાઈનરીનો ઉલ્લેખ કરે છે, જેનો અર્થ છે કે, તેઓ પુરુષ કે સ્ત્રીથી અલગ છે.
તેમની ચૂંટણીએ વિવાદ પણ ઉભો કર્યો. કેટલાક સ્ત્રોતો (માઇગ્રેશન વોચ સહિત) દાવો કરે છે કે, ભારતીય ઇમિગ્રન્ટ ડૉ. મણિવન્નન વિદ્યાર્થી વિઝા પર બ્રિટન આવ્યા હતા. તેઓ હવે સ્કોટલેન્ડમાં રાજકારણી બની ગયા છે અને બ્રિટનના વિભાજનની હિમાયત કરી રહ્યા છે. મણિવન્નનને વાર્ષિક આશરે રૂ. 99 લાખ પગાર મળશે. જોકે, તેમને પૂર્ણ-સમય માટે કામ કરવાનો કાયદેસર અધિકાર નથી.
તેઓ તેમના ગ્રેજ્યુએટ વિઝા માટે ક્રાઉડફંડિંગ કરી રહ્યા હતા, જેનાથી તેઓ આગામી 3 વર્ષ સુધી UKમાં રહી શકશે. મણિવન્નને બતાવ્યું હતું કે તેઓ તમિલનાડુની નીચલી જાતિમાંથી આવે છે. તેમણે કહ્યું કે, તેઓ ગ્રીન્સ પાર્ટીમાં એટલા માટે જોડાયા છે કે, તે પેલેસ્ટાઇનને સમર્થન આપે છે. હાલમાં, તેઓ વિદ્યાર્થી વિઝા પર છે, જે તેમને ટૂંકા ગાળા માટે કામ કરવાની મંજૂરી આપે છે.
ગયા વર્ષે, SNP સરકારે એક કાયદો બનાવ્યો હતો કે, UKના નાગરિક ન હોવા છતાં પણ કોઈ પણ વ્યક્તિ સંસદીય ચૂંટણી લડી શકે છે, જો કે તેમની પાસે ‘ટૂંકા ગાળાના અભ્યાસ વિઝા’ સહિત કેટલાક પ્રકારના રહેઠાણ માટેની પરમિટ હોય. આ અગાઉ, ચૂંટણી લડવા માટે કાયમી રહેઠાણ હોવાના અધિકારો જરૂરી હતા.
સપ્ટેમ્બર 2021માં સ્કોટલેન્ડની સેન્ટ એન્ડ્રુઝ યુનિવર્સિટીમાં અભ્યાસ કરવા જતા પહેલા મણિવન્નને દિલ્હીમાં લિબરલ આર્ટ્સ અને હ્યુમેનિટીઝનો અભ્યાસ કર્યો હતો. સ્કોટિશ ગ્રીન્સના પ્રવક્તાએ જણાવ્યું હતું કે, ક્યૂ પાસે માન્ય વિઝા છે, જે તેમને સ્કોટલેન્ડમાં રહેવા અને કામ કરવાનો અધિકાર આપે છે. તે એક કોમનવેલ્થ નાગરિક પણ છે, તેથી કોઈ વિવાદ છે જ નહીં.