ઉત્તર પ્રદેશના ગોંડા જિલ્લામાંથી એક ચોંકાવનારી ઘટના સામે આવી છે, જેનો વીડિયો સોશિયલ મીડિયા પર ઝડપથી વાયરલ થઈ રહ્યો છે. એવું કહેવામાં આવી રહ્યું છે કે એક મહિલાએ કથિત રીતે લગભગ આઠ વર્ષથી તેના પતિથી છુપાવીને આશરે 12 લાખ રૂપિયા એક પેટીમાં ભેગા કર્યા હતા, પરંતુ આ રૂપિયા ઉંદરો કતરી ગયા હતા.
2019ની આસપાસ, મહિલાએ થોડી થોડી રકમ બચાવવાનું શરૂ કર્યું અને તેને એક પેટીમાં રાખ્યા હતા. ઘણા વર્ષો પછી સમય જતાં, તેની બચત વધતી ગઈ, જે લગભગ 12 લાખ રૂપિયા સુધી પહોંચી ગઈ. મહિલાએ તેના પતિને પણ આ બચત વિશે જાણ કરી ન હતી. તે ભવિષ્યમાં આ પૈસાથી પોતાના માટે સોનાના દાગીના ખરીદવાનું વિચારી રહી હતી.
ઘણા વર્ષોથી પેટીને તાળું મારીને રાખી હતી, પરંતુ જ્યારે મહિલાએ તેની આ બચતનો ઉપયોગ કરવાનું નક્કી કર્યું અને તેને ખોલ્યું, ત્યારે તે અંદરનું દૃશ્ય જોઈને ચોંકી ગઈ હતી. નોટોના બંડલોને ઉંદરોએ વિવિધ જગ્યાએ કતરી ખાધા હતા. ઘણી નોટો ખરાબ રીતે નુકસાન પામી હતી, જ્યારે અન્ય નોટોના તો ફક્ત ટુકડા જ બચ્યા હતા. મહિલાએ વર્ષોથી કરેલી બચતની આ પરિસ્થિતિ જોઈને આજુ બાજુના લોકો પણ આશ્ચર્યચકિત થઈ ગયા હતા.
ઘટના પ્રકાશમાં આવ્યા પછી, મહિલાએ તેના પતિને આ બાબતની જાણ કરી. બંનેએ ટ્રંક ખોલીને બાકીની નોટો અને તેના ટુકડાઓ બહાર કાઢ્યા. આજુ બાજુના લોકોની મદદથી, તેઓએ નુકશાન પામેલી નોટોને અલગ કરવાનો પ્રયાસ કર્યો, જે થોડીઘણી સારી હતી તેને અલગ કરી. જો કે, એવું કહેવાય છે કે, બચાવેલા પૈસાના મોટા ભાગને ઉંદરોએ કતરી જઈને ભારે નુકસાન પહોંચાડ્યું હતું. મહિલા અને તેનો પરિવાર તેમની વર્ષોની બચતની આવી ખરાબ સ્થિતિ જોઈને ખૂબ જ દુઃખી હતા.
આ વીડિયો ઇન્સ્ટાગ્રામ પર શેર કરવામાં આવ્યો છે, જેને હજારો વ્યૂઝ મળ્યા છે. યુઝર્સ પણ આ વીડિયો પર પોતાની પ્રતિક્રિયા આપી રહ્યા છે. જ્યારે કેટલાક આઘાત વ્યક્ત કરી રહ્યા છે, તો કેટલાક મજાકની સાથે પ્રતિક્રિયા આપી રહ્યા છે.