કોકરોચ જનતા પાર્ટી (CJP)એ મુખ્ય ચૂંટણી કમિશનર (CEC) જ્ઞાનેશ કુમાર વિરુદ્ધ દેશવ્યાપી આંદોલનની જાહેરાત કરી છે. CJP ચીફ અભિજીત દીપકે ગુરુવારે દિલ્હીમાં જાહેરાત કરી હતી કે જો જ્ઞાનેશ કુમાર 48 કલાકની અંદર રાજીનામું નહીં આપે તો દેશભરમાં ચૂંટણી પંચ વિરુદ્ધ અભિયાન ચલાવવામાં આવશે. આ પછી દિલ્હીમાં જંતર-મંતર 2.0 પણ ચલાવવામાં આવશે. CJPએ ચૂંટણી પંચ અને સરકાર સમક્ષ 3 માંગણીઓ મૂકી છે. CJPના રાષ્ટ્રીય સંયોજક અભિજીત દીપકે અને બે સહ-સંયોજકો સૌરભ દાસ-આશુતોષ રાંકાએ પ્રેસ કોન્ફરન્સ દરમિયાન જ્ઞાનેશ કુમાર, BJP, કેન્દ્ર સરકાર અને સુપ્રીમ કોર્ટ પર પણ પ્રહારો કર્યા હતા.
CJPની આ 3 માંગણીઓ: જ્ઞાનેશ કુમારે રાજીનામું આપવું જોઈએ. તેની સામે તાત્કાલિક ફોજદારી કેસ દાખલ કરવો જોઈએ. તેમને કોણ આદેશ આપી રહ્યું હતું તેની તપાસ થવી જોઈએ.
આગામી તમામ ચૂંટણીઓ પર તાત્કાલિક અસરથી પ્રતિબંધ મૂકવો જોઈએ. જાન્યુઆરી 2024ની મતદાર યાદી પુનઃસ્થાપિત કરવી જોઈએ અને SIR બંધ કરવી જોઈએ. સુપ્રીમ કોર્ટે SIR સંબંધિત તમામ ફાઈલો જપ્ત કરવી જોઈએ.
2023ના એ કાયદાને કે જે ચૂંટણી કમિશનરોને કાયદાકીય કાર્યવાહીથી રક્ષણ આપે છે, તે કાયદો પાછો ખેંચી લેવો જોઈએ અને નવો કાયદો બનાવવો જોઈએ, જેમાં સિવિલ સમાજની પણ ભાગીદારી નક્કી થવી જોઈએ.
ગઈ કાલે જે રિપોર્ટ આવ્યો તે સાબિત કરે છે કે, મુખ્ય ચૂંટણી કમિશનર દેશના સૌથી મોટા ગદ્દાર છે. તેમણે તાત્કાલિક રાજીનામું આપવું જોઈએ. તે લોકશાહી માટે સૌથી મોટો ખતરો છે. લોકશાહીનો અર્થ એ હતો કે લોકો સરકાર પસંદ કરશે. પરંતુ જ્યારથી જ્ઞાનેશ કુમાર CEC બન્યા છે ત્યારથી સરકાર નક્કી કરી રહી છે કે કોણ વોટ આપશે અને કોણ મતદાન નહીં કરે.
દીપકેએ કહ્યું, છેલ્લી લોકસભા ચૂંટણીમાં જ્યારે BJP 240 પર સમેટાઈ ગયું ત્યારે તેમને લાગ્યું કે દેશનો મૂડ બદલાઈ રહ્યો છે. પ્રાદેશિક પક્ષો ખૂબ મજબૂત રીતે આગળ આવ્યા હતા. તેઓને એક પછી એક કરીને હરાવવામાં આવ્યા. મમતા બેનર્જીની સીટ પર 50 હજાર વોટ ડિલીટ થયા અને તેઓ હારી ગયા. દિલ્હીમાં અરવિંદ કેજરીવાલની સીટ પરથી 40 હજાર વોટ કાઢી નાખવામાં આવ્યા અને તેઓ હારી ગયા. અમને વિપક્ષ કે કોઈ ખાસ પક્ષ સાથે કોઈ ખાસ લગાવ નથી. પણ જો તમે વિપક્ષના ચહેરાને ખતમ કરી દેશો તો શું લોકશાહી રહેશે?
દીપકેએ કહ્યું કે, કેન્દ્ર સરકારે ઘણા રાજ્યોમાં સરકાર બદલી. ધારાસભ્યો અને સાંસદોને ખરીદવામાં આવ્યા હતા. પક્ષો તૂટી ગયા. પ્રાદેશિક પક્ષો તૂટી ગયા. ચૂંટણી પંચે ચિહ્ન છીનવી લીધું અને BJPની પ્રોક્સી/સેલ પાર્ટીને આપ્યું. પશ્ચિમ બંગાળમાં પણ આવું જ થઈ રહ્યું છે. આ બધા પાછળ જ્ઞાનેશ કુમાર ગુનેગાર છે. તેમણે સુનિશ્ચિત કર્યું છે કે, BJP કેવી રીતે સત્તામાં રહે. દીપકેએ આરોપ લગાવ્યો કે જ્ઞાનેશ કુમાર CEC બન્યા પછી હરિયાણા, મહારાષ્ટ્ર, દિલ્હી, પશ્ચિમ બંગાળ અને આસામમાં વોટ ટકાવારી વધી. BJP PM નરેન્દ્ર મોદીના ચહેરા પર ચૂંટણી જીતી રહ્યું છે પરંતુ અસલી હીરો જ્ઞાનેશ કુમાર છે.
સૌરભ દાસે કહ્યું, આ સિસ્ટમ બદલવી જોઈએ. પરંતુ આ સિસ્ટમ કેવી રીતે બદલાશે? તમારી પાસે એક જ સાધન છે, મત. જો આ પણ તમારી પાસેથી છીનવી લેવામાં આવે તો પરિવર્તન કેવી રીતે થશે? દેશભરના લોકો અમને પૂછે છે કે અમે કેવી રીતે બદલીશું, અમારા વોટથી કોઈ ફરક નથી પડતો. હવે જે રિપોર્ટ આવ્યો છે તે દેશના તમામ યુવાનોએ વાંચવો જોઈએ. SIR કરીને તમે 13 કરોડથી વધુ મતદારોને કાઢી નાખ્યા. રિપોર્ટ ગઈ કાલે પણ આવ્યો અને આજે પણ આવ્યો. છેલ્લા 10 મહિનામાં ચૂંટણી પંચમાં 14 વાંધા અરજીઓ આવી હતી. અન્ય બે ચૂંટણી કમિશનરોએ ફાઇલમાં ઘણી બધી ગેરકાયદેસર બાબતો લખી હતી અને કહ્યું હતું કે કઈ સારું નથી થઇ રહ્યું. સૌથી મહત્વની વાત એ છે કે જેઓ પહેલીવાર જોડાઈ રહ્યા છે તેમને રોકવામાં આવી રહ્યા છે, આ ફાઈલમાં લખેલું છે. આજની આખી વ્યવસ્થા પોકળ થઇ રહી છે.