સચિન તેંદુલકરે જે કંપનીમાં રોકાણ કર્યું છે, તેનો IPO આવી રહ્યો છે

શેરબજારમાં હાલમાં IPOની ભારે ચહલપહલ જોવા મળી રહી છે. નવા IPO આવી રહ્યા છે અને રોકાણકારો પાસેથી ખૂબ પૈસા જમા કરી રહ્યા છે. આ દરમિયાન, વધુ એક કંપની પોતાનો IPO લાવવાની તૈયારી કરી રહી છે. સચિન તેંદુલકરે પાંચ વર્ષ પહેલાં આ કંપનીમાં રોકાણ કર્યું હતું અને આજે પણ તેઓ આ કંપનીનો પ્રચાર કરી રહ્યા છે.

આ કંપનીનું નામ ‘સ્પિની’ (Spinny) છે, જે સેકન્ડ-હેન્ડ કારનું વેચાણ કરે છે. સ્પિનીએ માર્કેટ રેગ્યુલેટર SEBI પાસે IPO માટેના ડ્રાફ્ટ પેપર્સ પહેલેથી જ ફાઇલ કરી દીધા છે. ‘મનીકંટ્રોલ’ના અહેવાલ મુજબ, આ IPOનું કદ ₹2,500 કરોડથી ₹3,000 કરોડની વચ્ચે હોઈ શકે છે. ઓગસ્ટ મહિનામાં સ્પિનીની પેરેન્ટ કંપની, ‘વેલ્યૂડ્રાઇવ ટેક’ (ValueDrive Tech)નું પ્રાઇવેટ લિમિટેડ કંપનીમાંથી પબ્લિક લિમિટેડ કંપનીમાં રૂપાંતર થયા બાદ આ પ્રક્રિયા હાથ ધરવામાં આવી છે.

કંપની ક્યારે લિસ્ટ થશે?

આ ઇશ્યૂમાં નવા શેર જાહેર કરવામાં આવશે, જ્યારે હાલના શેરધારકો ‘ઓફર ફોર સેલ’ (OFS) દ્વારા તેમનો હિસ્સો વેચી શકે છે. કંપનીએ IPO માટે કોટક મહિન્દ્રા કેપિટલ કંપની, સિટીગ્રુપ ગ્લોબલ માર્કેટ્સ ઇન્ડિયા, મોર્ગન સ્ટેનલી ઇન્ડિયા કંપની અને 360 વન WAM (360 One WAM)ને ‘બુક-રનિંગ લીડ મેનેજર્સ’ બનાવી છે. કંપનીની યોજના 2027માં લિસ્ટ થવાની છે, પરંતુ લિસ્ટિંગની તારીખ હજુ નક્કી કરવામાં આવી નથી અને તે SEBIની મંજૂરી પર નિર્ભર કરશે છે.

સ્પિનીનો IPO લાવવાનો નિર્ણય એવા સમયે લેવામાં આવ્યો છે જ્યારે તેની આવકમાં સતત વધારો થઈ રહ્યો છે અને નુકસાન ઘટી રહ્યું છે. નિયમનકારી ફાઇલિંગ મુજબ, નાણાકીય વર્ષ 2025માં કામગીરીમાંથી થતી આવક 25% વધીને ₹4,657 કરોડ થઈ હતી, જે નાણાકીય વર્ષ 2024માં ₹3,730 કરોડ હતી. નાણાકીય વર્ષ 2026માં આવક વધીને અંદાજે ₹6,000 કરોડ સુધી પહોંચી હતી અને નાણાકીય વર્ષ 2027માં તેમાં વધુ 25-30% વૃદ્ધિ થવાનો અંદાજ છે.

આ કંપનીમાં કોણે રોકાણ કર્યું છે?

સ્પિનીની સ્થાપના 2015માં નીરજ સિંહ, મોહિત ગુપ્તા અને રમંશૂ કુમાર દ્વારા કરવામાં આવી હતી, જેમાં નીરજ સિંહ તેના CEO છે. કંપની જૂની કારના ખરીદ-વેચાણનો વ્યવસાય કરે છે અને સાથે સાથે ફાઇનાન્સિંગ, વીમો અને આફ્ટર-સેલ્સ સર્વિસિસ પણ પૂરી પાડે છે. હાલમાં, તે દર મહિને અંદાજે 15,000 કારનું વેચાણ કરે છે અને 25 શહેરોમાં કાર્યરત છે. કંપનીએ અત્યાર સુધીમાં આશરે 78 કરોડ ડોલર એકત્ર કરી ચૂકી છે, તેના સૌથી મોટા શેરધારકો ટાઈગર ગ્લોબલ અને એક્સેલ છે. કંપનીએ અગાઉ એક્સેલ લીડર્સ ફંડ, ફિડેલિટી ઇન્વેસ્ટમેન્ટ્સ અને અન્ય રોકાણકારો પાસેથી 150 કરોડ ડોલરથી 180 કરોડ ડોલરની વચ્ચેના વેલ્યુએશન પર આશરે 16.5 કરોડ ડોલર એકત્ર કર્યા હતા.