અમેરિકાએ અનેક મોટી IT કંપનીઓ સામે મોટા પગલાં લીધા છે. તેમાં ભારતીય કંપનીઓ પણ સામેલ છે. અમેરિકન શ્રમ વિભાગે તેમને ગ્રીન કાર્ડ સાથે જોડાયેલા ‘પરમનન્ટ લેબર સર્ટિફિકેશન પ્રોગ્રામ’ (PERM)માંથી સ્થગિત કર્યા છે. તેમાં કોગ્નિઝન્ટ, Infosys, ટાટા, વિપ્રો, HCL અને કેપજેમિનીનો સમાવેશ થાય છે. આ ઉપરાંત માઈક્રોસોફ્ટ અને Adobeને પણ આ પ્રોગ્રામમાંથી સ્થગિત કરવામાં આવ્યા છે. અમેરિકન અધિકારીઓએ આ કંપનીઓ પર ગ્રીન કાર્ડ પ્રોગ્રામનો દુરુપયોગ કરવાનો આરોપ લગાવ્યો છે.
ગારના આધારે ગ્રીન કાર્ડ મેળવવાની પ્રક્રિયામાં ‘પરમનન્ટ લેબર સર્ટિફિકેશન પ્રોગ્રામ’ મહત્ત્વની ભૂમિકા ભજવે છે. આ પ્રોગ્રામ હેઠળ, અમેરિકન શ્રમ વિભાગ પાસેથી મંજૂરી મળ્યા પછી, કંપની ગ્રીન કાર્ડ માટે વિદેશી કર્મચારીને સ્પોન્સર કરી શકે છે. આ પ્રક્રિયાના ભાગરૂપે કંપનીએ એ જણાવવું પડે છે કે, સંબંધિત પદ યોગ્ય અમેરિકન કર્મચારી ઉપલબ્ધ નથી. આનાથી વિદેશી કર્મચારી માટે ગ્રીન કાર્ડ મેળવવાની પ્રક્રિયા સરળ બને છે.
અમેરિકન શ્રમ મંત્રી કીથ સોન્ડરલિંગે આ કાર્યવાહીની જાણકારી આપી. તેમણે જણાવ્યું કે આ મોટી કંપનીઓ પર PERM સિસ્ટમનો દુરુપયોગ કરવાનો આરોપ છે. સોન્ડરલિંગે માઈક્રોસોફ્ટ અંગે સૌથી કડક નિવેદન આપ્યું હતું અને ભારપૂર્વક કહ્યું હતું કે અમેરિકામાં માઈક્રોસોફ્ટ કરતા વધુ આ સિસ્ટમનો અન્ય કોઈ કંપનીએ દુરુપયોગ કર્યો નથી.
અમેરિકાના ઉપરાષ્ટ્રપતિ વેન્સે માઈક્રોસોફ્ટ સામે ગંભીર આક્ષેપો લગાવ્યા. તેમણે જણાવ્યું હતું કે માઈક્રોસોફ્ટે 2025માં લગભગ 6,000 અમેરિકન કર્મચારીઓને છૂટા કર્યા હતા, જ્યારે અગાઉ તેણે પ્રમાણિત કર્યું હતું કે તેને આ પદો માટે લાયક અમેરિકન કામદારો મળતા નથી. આમ છતા માઈક્રોસોફ્ટને 6,000થી વધુ H-1B વિઝા આપવામાં આવ્યા હતા અને ગ્રીન કાર્ડ માટે 3,682 અરજીઓ દાખલ કરવામાં આવી હતી.
તેમણે દાવો કર્યો હતો કે આમાંની લગભગ 1,000 અરજીઓ એ જ પદો માટે હતી જેમાંથી અમેરિકન કર્મચારીઓને છૂટા કરવામાં આવ્યા હતા. વેન્સે જણાવ્યું હતું કે H-1B વિઝા સિસ્ટમનો ઉદ્દેશ્ય એ પદો માટે વિદેશથી અત્યંત લાયક વ્યક્તિઓને લાવવાનો હતો, જેમને અમેરિકન કર્મચારીઓથી ભરી શકાતા નહોતા. જોકે, તેમણે આક્ષેપ કર્યો હતો કે આ સિસ્ટમ હવે મોટા પ્રમાણમાં છેતરપિંડી અને દુરુપયોગથી પ્રભાવિત થઇ ગઇ છે.
શ્રમ વિભાગે નવ યુનિવર્સિટીઓની પણ તપાસ શરૂ કરી છે. તેમાં હાર્વર્ડ, યેલ અને સ્ટેનફોર્ડ જેવી અગ્રણી સંસ્થાઓનો સમાવેશ થાય છે. અમેરિકન અધિકારીઓનો આરોપ છે કે આ યુનિવર્સિટીઓએ અમેરિકન કર્મચારીઓના પગાર ખર્ચમાં ઘટાડો કરવા માટે આંતરરાષ્ટ્રીય વિદ્યાર્થીઓને નોકરી પર રાખવાનો પ્રયાસ કર્યો હતો. શ્રમ વિભાગના મહાનિરીક્ષક એન્થોની ડી’એસ્પૉસિટોએ જણાવ્યું હતું કે આ કેસોમાં સામેલ સંસ્થાઓને સમન્સ પણ મોકલવામાં આવ્યા છે.
આ કાર્યવાહીની અસર અમેરિકામાં ગ્રીન કાર્ડ માટે આ કંપનીઓ દ્વારા અરજી કરનારા કર્મચારીઓ પર પડી શકે છે. ખાસ કરીને જે કર્મચારીઓની ગ્રીન કાર્ડની પ્રક્રિયા હાલમાં ચાલુ છે, તેમના માટે વિલંબ અને અનિશ્ચિતતા વધી શકે છે. જોકે, કોઈ કંપનીને આ કાર્યક્રમમાંથી સસ્પેન્ડ કરવાનો અર્થ એ નથી કે અગાઉ મંજૂર થયેલા ગ્રીન કાર્ડ આપમેળે રદ થઈ જશે. આ કાર્યવાહીની મુખ્ય અસર નવી અથવા ચાલુ ગ્રીન કાર્ડ અરજીઓ પર પડવાની સંભાવના છે.
અમેરિકન સરકારનું કહેવું છે કે તેનો ઉદ્દેશ્ય એ સુનિશ્ચિત કરવાનો છે કે વિદેશી કર્મચારીઓની જગ્યાએ ઓછા ખર્ચવાળા વિકલ્પ તરીકે ન થાય. આ સમગ્ર કાર્યવાહીનો ઉદ્દેશ્ય અમેરિકન કર્મચારીઓના હિતોનું રક્ષણ કરવાનો અને રોજગારના નિયમોનું પાલન સુનિશ્ચિત કરવાનો છે.