શુક્રવારે, કોકરોચ જનતા પાર્ટીએ કેન્દ્ર સરકાર પર નિશાન સાધ્યું, અને આરોપ લગાવ્યો કે સરકાર Gen-Zથી ડરી ગઈ છે. CJPએ કહ્યું કે દેશમાં કટોકટી જેવી સ્થિતિ ઉભી કરવામાં આવી છે. હકીકતમાં, CJPએ શનિવારે જંતર મંતર પર મોટા વિરોધ પ્રદર્શનની જાહેરાત કરી છે. દિલ્હી પોલીસે આ વિરોધ પ્રદર્શન માટે પરવાનગી આપી નથી, અને રાજધાની સુરક્ષા ઘેરામાં ફેરવાઈ ગઈ છે. કોકરોચ જનતા પાર્ટી (CJP)એ શનિવારે સવારે 10 વાગ્યે દિલ્હીના જંતર મંતર પર એકઠા થવા માટે એક પોસ્ટર બહાર પાડ્યું છે.
CJPના સ્થાપક અભિજીત દીપકેએ હવે સરકાર પર નિશાન સાધ્યું છે, આરોપ લગાવ્યો છે કે, પ્રદર્શનકારીઓને રોકવા માટે લોકોના આવવા જવા પર પણ પ્રતિબંધો લગાવી દેવામાં આવી રહ્યા છે. દીપકે કહ્યું, ‘કેન્દ્ર સરકાર Gen-Zથી ડરી રહી છે.’
અભિજીત દીપકે કહ્યું કે, CJPના કાર્યકરો શનિવારે જંતર મંતર પર વિરોધ પ્રદર્શન કરવાની તેમની યોજના પર અડગ છે. સરકાર પર નિશાન સાધતા તેમણે કહ્યું, ‘જો તમને યુવાનોથી આટલો ડર લાગે છે, તો આખા દેશને જ બંધ કરી દો.’
તેમણે 10 ઓક્ટોબરના રોજ સવારે 4 થી બપોરે 2 વાગ્યા દરમિયાન નવી દિલ્હી અને હઝરત નિઝામુદ્દીન રેલ્વે સ્ટેશનો પર આવતી અનેક મેઇલ અને એક્સપ્રેસ ટ્રેનોને રદ કરવાની પણ ટીકા કરી. દિપકેએ BJPની આગેવાની હેઠળની કેન્દ્ર સરકારને પડકાર ફેંકતા કહ્યું કે, જો સરકાર ઇચ્છે તો તેમની ધરપકડ કરી શકે છે.
CJPના સૌરવ દાસે દેશની વર્તમાન પરિસ્થિતિની તુલના કટોકટી સાથે કરી. તેમણે દાવો કર્યો કે BJP શાસિત રાજ્યોમાં પાર્ટીના કેટલાક કાર્યકરોની અટકાયત કરવામાં આવી રહી છે, જ્યારે અન્યને નજરકેદ કરવામાં આવ્યા છે. દાસે કહ્યું, ‘કોઈ ભ્રમમાં ન રહો. દેશમાં કટોકટી લાગુ કરી દેવામાં આવી છે, અને દિલ્હીને સુરક્ષાના કિલ્લામાં ફેરવી દેવામાં આવ્યું છે.’
અત્રે ઉલ્લેખનીય છે કે, CJPએ શનિવારે જંતર-મંતર પર વિરોધ પ્રદર્શનનું આયોજન કર્યું છે, પરંતુ દિલ્હી પોલીસે પાર્ટીની આ પ્રદર્શન કરવાની માંગણી નકારી કાઢી હતી. સંગઠન મુખ્ય ચૂંટણી કમિશનર જ્ઞાનેશ કુમારના રાજીનામાની માંગ કરી રહ્યું છે, જેમાં મતદાર યાદીઓના વિશેષ સુધારામાં ગેરરીતિઓનો આરોપ લગાવવામાં આવ્યો છે. વિપક્ષ પણ આ મુદ્દાને લઈને સતત રસ્તાઓ પર વિરોધ પ્રદર્શન કરી રહ્યું છે.