તમિલનાડુના રાજકારણમાંથી એક મોટી ઘટના સામે આવી છે. DMK નેતા અને રાજ્યના પૂર્વ શાળા શિક્ષણ મંત્રી અનબિલ મહેશ પોય્યામોઝીની 100 કરોડના કથિત ખાનગી શાળા કૌભાંડના સંબંધમાં ધરપકડ કરવામાં આવી છે. આ કાર્યવાહી સોમવારે ગ્રેટર ચેન્નાઈ પોલીસની સેન્ટ્રલ ક્રાઈમ બ્રાન્ચ (CCB) દ્વારા કરવામાં આવી હતી. અનબિલ મહેશ પોય્યામોઝીએ ધરપકડથી બચવા માટે મદ્રાસ હાઈકોર્ટમાં અરજી કરી હતી; જોકે, કોર્ટે તેમની આગોતરા જામીન અરજી ફગાવી દીધી હતી. કોર્ટે અરજી ફગાવી દીધાના થોડા સમય બાદ જ, CCBની ટીમે તેમને કસ્ટડીમાં લઈ લીધા હતા.
શું છે 100 કરોડનું આ કૌભાંડ?
આ મામલો અનબિલ મહેશ શાળા શિક્ષણ મંત્રી (2021–2026) રહેવા દરમિયાનનો છે. તપાસ એજન્સીના જણાવ્યા અનુસાર, તેમના કાર્યકાળ દરમિયાન તેમણે 1000થી વધુ ખાનગી શાળાઓના સંચાલકો પાસેથી પાર્ટી ફંડના નામે કરોડો રૂપિયા વસૂલ્યા હોવાનો આરોપ છે. આ રકમની બદલામાં, શાળાઓને કાયમી માન્યતા અને અન્ય જરૂરી વહીવટી મંજૂરીઓ આપવાની હતી. આરોપ છે કે આ ખાનગી શાળાઓને લાભ પહોંચાડવા માટે નિયમોની અવગણના કરવામાં આવી હતી, જેના પરિણામે અંદાજે ₹100 કરોડની ગેરરીતિ આચરવામાં આવી હતી.
સેન્ટ્રલ ક્રાઈમ બ્રાન્ચે આ મામલે ‘પ્રિવેન્શન ઓફ કરપ્શન એક્ટ’ની જોગવાઈઓ હેઠળ FIR નોંધી છે. પોલીસ હવે એ વાતની કડી જોડવાનો પ્રયાસ કરી રહી છે કે વસૂલવામાં આવેલી રકમ ક્યાં-ક્યાં મોકલવામાં આવી અને વિભાગના અન્ય કયા અધિકારીઓની મિલીભગત હતી.
કોણ છે તમિલનાડુના પૂર્વ શાળા શિક્ષણ મંત્રી અનબિલ મહેશ?
DMKના રાજકારણમાં એક મજબૂત યુવા ચહેરા તરીકે પોતાની ઓળખ બનાવનારા તમિલનાડુના પૂર્વ શિક્ષણ મંત્રી અનબિલ મહેશ પોય્યામોઝીનું નામ પાર્ટીના સૌથી પ્રભાવશાળી નેતાઓમાંના એક ગણાય છે. તેઓ એક જાણીતા રાજકીય પરિવારમાંથી આવે છે. તેમના દાદા,અનબિલ પી. ધર્મલિંગમ, DMKના સંસ્થાપક સભ્યોમાંના એક હતા અને પક્ષના કદાવર નેતા હતા. તેમના પિતા અનબિલ પોય્યામોઝી પણ DMK તરફથી ધારાસભ્ય રહી ચૂક્યા છે. અનબિલ મહેશને મુખ્યમંત્રી એમ.કે. સ્ટાલિન અને ખાસ કરીને તેમના પુત્ર ઉધયનિધિ સ્ટાલિનના અત્યંત નજીકના મિત્ર અને વિશ્વાસુ માનવામાં આવે છે.
અનબિલ મહેશે ત્રિચીના તિરુવેરુમ્બુર વિધાનસભા મતવિસ્તારમાંથી ચૂંટણી જીતીને મુખ્ય પ્રવાહના રાજકારણમાં શાનદાર એન્ટ્રી કરી હતી. 2021ની વિધાનસભા ચૂંટણીમાં DMKની જીત અને એમ.કે. સ્ટાલિનના નેતૃત્વમાં સરકારની રચના બાદ, અનબિલ મહેશને શાળા શિક્ષણ જેવા મહત્ત્વપૂર્ણ વિભાગની જવાબદારી સોંપવામાં આવી. 2021 થી 2026 સુધીના તેમના કાર્યકાળ દરમિયાન, તેમણે શિક્ષણ વ્યવસ્થામાં અનેક નવા પ્રયોગ કર્યા અને યોજનાને અમલમાં મૂકવાનો દાવો કર્યો.