JDS નેતા અને કેન્દ્રીય મંત્રી HD કુમારસ્વામીએ એમ કહીને BJPને આંચકો આપ્યો છે કે, તેઓ કર્ણાટકમાં તેમની પદયાત્રાને સમર્થન નહીં આપે. કર્ણાટકમાં મુખ્ય વિપક્ષી પાર્ટી BJP 3 થી 10 ઓગસ્ટ વચ્ચે CM સિદ્ધારમૈયાની આગેવાની હેઠળની કોંગ્રેસ સરકાર વિરુદ્ધ પદયાત્રા કાઢવા જઈ રહી છે. એટલું જ નહીં, કુમારસ્વામીએ ત્યાં સુધી કહ્યું કે, તેઓ આ મામલે BJPને નૈતિક સમર્થન પણ નહીં આપે. કર્ણાટકમાં JDS અને BJPનું ગઠબંધન છે અને કુમારસ્વામી કેન્દ્રમાં ભારે ઉદ્યોગ અને સ્ટીલ મંત્રી છે.
જ્યારે પત્રકારોએ તેમને આનું કારણ પૂછ્યું, તો તેમણે કહ્યું કે, અમે NDA સરકારમાં BJPના સાથી છીએ પરંતુ તેમણે અમને તેમની પદયાત્રા માટે પૂછવું જરૂરી ન માન્યું. અમારી સલાહ લેવામાં આવી ન હતી. મંગળવારે અમારી કોર કમિટીની બેઠક મળી હતી અને આ મુદ્દે BJPને સમર્થન ન આપવાનો નિર્ણય લીધો હતો.
તેમણે કહ્યું કે, કેરળમાં ભારે વરસાદને કારણે સેંકડો લોકોના જીવ જોખમમાં છે અને જે લોકો ત્યાં ગયા છે તેમના માટે પરત ફરવું હાલમાં મુશ્કેલ છે. તેમણે આ વાત વાયનાડમાં ભારે વિનાશના સંદર્ભમાં કહી હતી. આ બધાની વચ્ચે BJPએ કોઈપણ જાતની સલાહ લીધા વગર જ પદયાત્રાનો પ્લાન બનાવી લીધો હતો. આવી સ્થિતિમાં જ્યારે કેરળની સ્થિતિ આટલી ખરાબ છે, ત્યારે આવી પદયાત્રાનો વિચાર યોગ્ય નથી. અસરગ્રસ્ત લોકોને મદદ કરવાનો અને તેમની લાગણીઓ સાથે જોડવાનો આ સમય છે. તેથી અમે BJPની પદયાત્રામાં નહીં જોડાવાનો નિર્ણય લીધો છે.
તેમણે એમ પણ ઉમેર્યું હતું કે, હાલમાં ખેતી કરવાનો સમય છે અને દરેક વ્યક્તિએ આ કામોમાં જોડાવું જોઈએ. કુમારસ્વામીના આ સ્ટેન્ડથી BJPને મોટો ફટકો પડ્યો છે, કારણ કે તે પોતાની પદયાત્રામાં JDSનું સમર્થન પણ માંગી રહી હતી.
કેરળના વાયનાડના ચુરલપારામાં મંગળવારે એક વિશાળ ભૂસ્ખલન થયું. મૃત્યુઆંક 159 પર પહોંચી ગયો છે. જ્યારે 90થી વધુ લોકો હજુ પણ લાપતા હોવાનું જાણવા મળ્યું છે. રાત્રે 2 વાગ્યાની આસપાસ ભૂસ્ખલન થયું અને આ વિસ્તાર સંપૂર્ણ રીતે કપાઈ ગયો છે. સૌથી વધુ અસરગ્રસ્ત વિસ્તારોમાં ચુરલમાલા, વેલ્લારીમાલા, મુંડાકાઈલ અને પોથુકાલુનો સમાવેશ થાય છે. આ વિસ્તારોના સ્થાનિક લોકો, જેઓ કોઈક રીતે બચવામાં સફળ રહ્યા હતા, તેઓ વિનાશની તીવ્રતાથી ખરાબ રીતે તબાહ થઈ ગયા છે. આ ભયાનક દુર્ઘટના પછી આર્મી, એરફોર્સ, નેવી, NDRF, પોલીસ અને ફાયર ફોર્સની ટીમો બચાવ કાર્યમાં લાગેલી છે.
ભારતીય સેનાના સધર્ન કમાન્ડે કહ્યું કે, વાયનાડમાં ભૂસ્ખલન પછી ભારતીય સેના NDRF, રાજ્ય બચાવ દળ, કોસ્ટ ગાર્ડ, નેવી અને એરફોર્સની સાથે સંકટના આ સમયમાં સતત કામ કરી રહી છે. માનવસર્જિત પુલ બનાવીને અત્યાર સુધીમાં 1000 લોકોને બચાવી લેવામાં આવ્યા છે. સેનાની ટુકડીએ લગભગ 70 મૃતદેહો બહાર કાઢ્યા છે.
એક્સ પરની પોસ્ટમાં જણાવ્યું હતું કે, ‘ભારતીય વાયુસેના એરક્રાફ્ટ AN-32 અને C-130 દ્વારા ત્રિવેન્દ્રમથી મંગળવારે સવારે 10:30 વાગ્યે બે વધારાની સૈન્ય ટુકડીઓ કાલિકટ પહોંચી હતી. આ ટુકડીઓએ સાંજે 6 વાગે વાયનાડ તરફ આગળની યાત્રા શરૂ કરી હતી. સૈન્ય અધિકારી, જે બુધવારે સવારે 6:45 વાગ્યા સુધી રજા પર હતા, તે મિશનમાં જોડાવા માટે સ્વેચ્છાએ આગળ આવ્યા છે.’
સધર્ન કમાન્ડે જણાવ્યું હતું કે, મદ્રાસ એન્જિનિયર ગ્રુપ અને સેન્ટરની એન્જિનિયર ટાસ્ક ફોર્સ ભૂસ્ખલન સ્થળ પર પહોંચી ગઈ છે. અહીં 170 ફૂટનો પુલ બનાવવાની યોજના છે. મેપ્પડી-ચુરલમાલા રોડ પર બચાવ કાર્ય ચાલી રહ્યું છે. ત્રણ બેલી બ્રિજ, JCB અને ટાટ્રા ટ્રક પણ ટૂંક સમયમાં વાયનાડ પહોંચશે અને બચાવ કામગીરીમાં જોડાશે.