ભારતના વિદેશ મંત્રી S જયશંકર શુક્રવારે માલદીવની ત્રણ દિવસની મુલાકાતે પહોંચ્યા હતા. તેમની મુલાકાત એવા સમયે આવી છે જ્યારે માલદીવ નવી દિલ્હી સાથે સંબંધો સુધારવાનો પ્રયાસ કરી રહ્યું છે. મુલાકાત દરમિયાન, જયશંકરનું ધ્યાન મોહમ્મદ મુઇઝ્ઝુની આગામી સંભવિત ભારત મુલાકાત માટેની તૈયારીઓ પર છે. મુઈઝ્ઝુ રાષ્ટ્રપતિ બન્યા પછી અને માલદીવમાં મદદ માટે તૈનાત ભારતીય સૈન્ય કર્મચારીઓને પાછા ખેંચવાનો આગ્રહ રાખ્યા પછી બંને દેશો વચ્ચેના સંબંધો બગડ્યા. મોહમ્મદ મુઈઝ્ઝુ જૂનમાં મોદી સરકારના શપથ ગ્રહણ માટે પહેલીવાર ભારત આવ્યા હતા. મુઈઝ્ઝુ સપ્ટેમ્બરમાં તેની પ્રથમ સત્તાવાર રાજકીય મુલાકાત લે તેવી શક્યતા છે.
માલદીવના વિદેશ પ્રધાન મૂસા ઝમીર આ મે મહિનામાં ભારતની મુલાકાતે આવ્યા હતા, જેમાં તેમણે મુઈઝ્ઝુની મુલાકાતનો સંકેત આપ્યો હતો. આ અગાઉ, જયશંકર જાન્યુઆરી 2023માં માલદીવની મુલાકાતે ગયા હતા, જ્યારે ઇબ્રાહિમ સોલેહ માલેમાં સત્તા પર હતા. જયશંકર અને ઝમીર અગાઉ જાન્યુઆરીમાં યુગાન્ડાની રાજધાની કમ્પાલામાં બિન-જોડાણવાદી ચળવળની બે દિવસીય સમિટમાં મળ્યા હતા. જયશંકરની મુલાકાત અંગે માહિતી આપતા માલદીવના વિદેશ મંત્રાલયે ગુરુવારે જણાવ્યું હતું કે, આ સમયગાળા દરમિયાન નવી દિલ્હી અને માલે હાઈ ઈમ્પેક્ટ કોમ્યુનિટી ડેવલપમેન્ટ પ્રોજેક્ટ અને ભારતની એક્ઝિમ બેંકની લાઈન ઓફ ક્રેડિટ ફેસિલિટી હેઠળ પૂર્ણ થયેલા પ્રોજેક્ટ્સનું ઉદ્ઘાટન કરશે.
જયશંકરે માલેમાં તેમના સમકક્ષને મળ્યા પછી એક પ્રેસ કોન્ફરન્સમાં કહ્યું કે, ‘માલદીવ્સ અમારી ‘પડોશી પહેલો’ નીતિના પાયાના પથ્થરોમાંનું એક છે, તે અમારા ‘વિઝન સાગર’ તેમજ ‘ગ્લોબલ સાઉથ’ પ્રત્યેની અમારી પ્રતિબદ્ધતા માટે પણ તે મહત્વનું છે. PM નરેન્દ્ર મોદીના શબ્દોમાં ટૂંકમાં કહીએ તો, ભારતનો પડોશી પ્રાથમિકતા છે અને તેની પડોશમાં માલદીવ પ્રાથમિકતા છે.’ જયશંકરે કહ્યું, ‘અમે ઈતિહાસ અને સગપણના સૌથી નજીકના બંધનો પણ શેર કરીએ છીએ.’
માલેમાં, વિદેશ મંત્રી S જયશંકરે તેમના સમકક્ષ મુસા જામીર સાથે સુરક્ષા, વેપાર અને ડિજિટલ સહયોગ અંગે ચર્ચા કરી. બંને નેતાઓએ સાથે આજે સ્ટ્રીટ લાઇટિંગ, માનસિક સ્વાસ્થ્ય, બાળકોની સ્પીચ થેરાપી અને વિશેષ શિક્ષણના ક્ષેત્રોમાં છ પ્રોજેક્ટનું ઉદ્ઘાટન કર્યું હતું. વિદેશ પ્રધાન જયશંકરે શુક્રવારે મોડી રાત્રે ટ્વિટર પર એક પોસ્ટમાં જણાવ્યું હતું કે, ‘આજે માલેમાં વિદેશ મંત્રી મુસા ઝમીર સાથે ફળદાયી ચર્ચા થઈ. આ એજન્ડામાં વિકાસ ભાગીદારી, ક્ષમતા નિર્માણ, દ્વિપક્ષીય અને પ્રાદેશિક સુરક્ષા, વેપાર અને ડિજિટલ સહયોગમાં અમારી જોડાણ સામેલ છે. આ ઉપરાંત સ્ટ્રીટ લાઇટિંગ, માનસિક સ્વાસ્થ્ય, બાળકોની સ્પીચ થેરાપી અને સ્પેશિયલ એજ્યુકેશનના ક્ષેત્રોમાં 6 હાઇ ઇમ્પેક્ટ પ્રોજેક્ટનું સંયુક્ત રીતે ઉદ્ઘાટન કરવામાં આવ્યું હતું.’
તેમણે માહિતી આપી હતી કે, માલદીવમાં ડિજિટલ પેમેન્ટ સિસ્ટમ શરૂ કરવા માટે ભારતના નેશનલ પેમેન્ટ્સ કોર્પોરેશન અને માલદીવના આર્થિક વિકાસ અને વેપાર મંત્રાલય વચ્ચે MOU પર હસ્તાક્ષર કરવામાં આવ્યા હતા. નેશનલ સેન્ટર ફોર ગુડ ગવર્નન્સ અને સિવિલ સર્વિસ કમિશન વચ્ચે વધારાના 1000 સિવિલ સર્વિસ અધિકારીઓની તાલીમ અંગેના સમજૂતી કરારના નવીકરણનું સ્વાગત કર્યું.