આંધ્રપ્રદેશના વિશ્વ પ્રસિદ્ધ તિરુપતિ બાલાજી મંદિરમાં લાડુમાં ઘીની ભેળસેળનો મુદ્દો ગરમ થઈ રહ્યો છે. તપાસમાં સામે આવ્યું છે કે, AR ડેરીને માત્ર રૂ. 320 પ્રતિ કિલોના ભાવે ઘી સપ્લાય કરવાનો કોન્ટ્રાક્ટ આપવામાં આવ્યો હતો અને નંદિની ઘીનું ટેન્ડર રદ કરવામાં આવ્યું હતું. ત્યાર પછી જુલાઈમાં ઘીમાં ભેળસેળ જોવા મળી હતી અને ફરીથી 470 રૂપિયા પ્રતિ કિલોના ભાવે નંદિની બ્રાન્ડને ઘીનો કોન્ટ્રાક્ટ આપવામાં આવ્યો હતો.
એક અહેવાલનો ઉલ્લેખ કરીને આંધ્રપ્રદેશના CM ચંદ્રબાબુ નાયડુએ દાવો કર્યો છે કે, અગાઉની જગનમોહન રેડ્ડી સરકારમાં બાલાજી મંદિરના પ્રસાદમાં ઘીની જગ્યાએ માછલીનું તેલ અને પ્રાણીની ચરબી ભેળવવામાં આવતી હતી. જગન મોહને કહ્યું કે, દાવા ખોટા છે અને CM નાયડુ ભગવાનના નામે રાજનીતિ કરી રહ્યા છે.
મીડિયા સૂત્રોને ઘીના ટેન્ડરની કોપી મળી છે, જેણે ખરીદીની પ્રક્રિયા પર સવાલો ઉભા કર્યા છે. સૂત્રોના જણાવ્યા અનુસાર ટેન્ડરની શરતોનો ભંગ કરવામાં આવ્યો હતો અને ઘી ટેસ્ટિંગ માટે મોકલવામાં આવ્યું ન હતું. ટેન્ડરની કલમ 80 મુજબ, સપ્લાય કરવામાં આવેલ ઘીના દરેક કન્સાઈનમેન્ટ માટે NABL પ્રમાણપત્ર સબમિટ કરવું જરૂરી છે.
આ ઉપરાંત, ટેન્ડર કલમ 81 મુજબ, લેબ પરીક્ષણ માટે તિરુમાલા તિરુપતિ દેવસ્થાનમ (TTD)ને ઘીના નમૂના મોકલવા ફરજિયાત છે. સવાલો ઉભા થઈ રહ્યા છે કે, ઓગસ્ટ 2023 અને જુલાઈ 2024 વચ્ચે બ્લેકલિસ્ટેડ કંપનીના અગાઉના સેમ્પલમાં આ ભેળસેળ કેવી રીતે મળી ન હતી? શું TTD એ NABL/લેબ પરીક્ષણ માટે નમૂનાઓ મોકલ્યા નથી? શું બ્લેકલિસ્ટેડ કંપનીએ જે બેચમાં ભેળસેળ મળી હતી તેનું NABL પ્રમાણપત્ર રજૂ કર્યું ન હતું?
TTD EO રાવે જણાવ્યું હતું કે, ‘ચારેય સેમ્પલના રિપોર્ટમાં સમાન પરિણામો જોવા મળ્યા છે. તેથી, અમે તાત્કાલિક પુરવઠો બંધ કરી દીધો છે. કોન્ટ્રાક્ટરને બ્લેકલિસ્ટ કરવાની પ્રક્રિયા શરૂ કરવામાં આવી છે અને દંડ વસૂલવાની પ્રક્રિયા પણ શરૂ કરવામાં આવશે. હવે કાયદાકીય પ્રક્રિયા હાથ ધરાશે. ગુણવત્તાના અભાવનું કારણ ઘરની અંદરની લેબનો અભાવ છે, નમૂનાઓને પરીક્ષણ માટે બહારની લેબમાં મોકલવા અને વ્યાજબી દરો ન હોવાનો સમાવેશ થાય છે.’
તેમણે કહ્યું કે, સપ્લાયર્સે આ ખામીઓનો ફાયદો ઉઠાવ્યો અને રૂ. 320 થી રૂ. 411 વચ્ચે ઘી સપ્લાય કર્યું. તેમણે કહ્યું કે ગાયના શુદ્ધ ઘીના સપ્લાય માટે આ પ્રાઇસ બેન્ડ યોગ્ય નથી.
કેન્દ્રીય આરોગ્ય મંત્રી J. P. નડ્ડાએ શુક્રવારે કહ્યું કે, તેમણે આંધ્ર પ્રદેશના CM N ચંદ્રબાબુ નાયડુ સાથે વાત કરી છે અને તિરુપતિ લાડુ મુદ્દે રિપોર્ટ માંગ્યો છે. નડ્ડાએ કહ્યું કે, ફૂડ સેફ્ટી એન્ડ સ્ટાન્ડર્ડ ઓથોરિટી ઓફ ઈન્ડિયા (FSSAI) દ્વારા આ બાબતની તપાસ કરવામાં આવશે અને યોગ્ય પગલાં લેવામાં આવશે.
આ અગાઉ, તેલુગુ દેશમ પાર્ટીના પ્રવક્તા અનમ વેંકટ રમન રેડ્ડીએ કથિત લેબોરેટરી રિપોર્ટ દર્શાવ્યો હતો, જેમાં આપવામાં આવેલા ઘીના નમૂનામાં ‘ગૌમાંસની ચરબી’ હોવાની પુષ્ટિ થઈ હતી, લેબોરેટરી રિપોર્ટના નમુનામાં ‘લાર્ડ’ (ડુક્કરના માંસની ચરબી સંબંધિત) અને માછલીના તેલની હાજરીનો પણ દાવો કરવામાં આવે છે.
સેમ્પલ એકત્ર કરવાની તારીખ 9 જુલાઈ, 2024 હતી અને લેબોરેટરી રિપોર્ટની તારીખ 16 જુલાઈ હતી. જો કે, પ્રસિદ્ધ શ્રી વેંકટેશ્વર સ્વામી મંદિરનું સંચાલન કરતી આંધ્ર પ્રદેશ સરકાર અથવા તિરુમાલા તિરુપતિ દેવસ્થાનમ્સ (TTD) તરફથી પ્રયોગશાળાના અહેવાલ પર કોઈ સત્તાવાર પુષ્ટિ મળી નથી.
