ટીમ ઈન્ડિયાનો ઝડપી બોલર મોહમ્મદ શમી વર્લ્ડ કપ 2023ની ફાઈનલ પછીથી રમતના મેદાનથી દૂર છે. એવી આશા હતી કે તે ઓસ્ટ્રેલિયાના પ્રવાસ પર રમાનાર પાંચ મેચની ટેસ્ટ શ્રેણી માટે ફિટ થઈ જશે, પરંતુ હવે એવા અહેવાલ સામે આવ્યા છે કે, મોહમ્મદ શમી સ્વસ્થ થતાં થતાં ફરી ઈજાગ્રસ્ત થઈ ગયો છે. આ કારણે તેનું ઓસ્ટ્રેલિયામાં બોર્ડર-ગાવસ્કર ટ્રોફી રમવું પણ જોખમમાં છે. તેણે તેની છેલ્લી આંતરરાષ્ટ્રીય મેચ ઓસ્ટ્રેલિયા સામે જ રમી હતી, જે ODI વર્લ્ડ કપ 2023ની અંતિમ મેચ હતી. તે ટૂર્નામેન્ટમાં મોહમ્મદ શમીએ જોરદાર પ્રદર્શન કર્યું હતું.
મોહમ્મદ શમી પગ અને પગની ઘૂંટીની ઇજાઓ માટે સર્જરી પછી પુનર્વસન હેઠળ હતો. તે હાલમાં બેંગલુરુ સ્થિત નેશનલ ક્રિકેટ એકેડમી એટલે કે NCAમાં છે. મીડિયા સૂત્રોના અહેવાલ મુજબ, હવે ઘૂંટણમાં ઈજા છે અને ઘૂંટણમાં સોજો છે. આવી સ્થિતિમાં તે આગામી 6 થી 8 અઠવાડિયા સુધી પુનરાગમનથી દૂર રહેશે. BCCIની મેડિકલ ટીમ હાલમાં તેની સ્થિતિનું મૂલ્યાંકન કરી રહી છે. જ્યાં સુધી તે સ્વસ્થ થશે ત્યાં સુધીમાં ઓસ્ટ્રેલિયા સામે પાંચ મેચની ટેસ્ટ શ્રેણી શરૂ થશે, જેમાં પ્રથમ ટેસ્ટ મેચ નવેમ્બરના અંતમાં રમાશે.
BCCIના એક સૂત્રએ મોહમ્મદ શમી વિશે જણાવ્યું હતું કે, ‘શમીએ ફરી બોલિંગ શરૂ કરી છે અને તે ટૂંક સમયમાં જ સ્પર્ધાત્મક ક્રિકેટમાં પરત ફરવા જઈ રહ્યો છે, પરંતુ આ ઘૂંટણની ઈજા તાજેતરમાં ફરી સામે આવી છે. BCCIની મેડિકલ ટીમ ઈજાનું મૂલ્યાંકન કરી રહી છે, પરંતુ તેમાં ઘણો સમય લાગી શકે છે. NCA મેડિકલ ટીમ માટે આ ઝટકા સમાન છે. તેઓ એક વર્ષથી તેના પર કામ કરી રહ્યા છે. તેમની પાસે શ્રેષ્ઠ વર્કલોડ મેનેજમેન્ટ સિસ્ટમ છે. મેડિકલ ટીમ તેને શક્ય તેટલી વહેલી તકે મેદાનમાં પરત લાવવાનો પૂરો પ્રયાસ કરી રહી છે.’
મોહમ્મદ શમીની આ નવી ઈજા ઓસ્ટ્રેલિયામાં 22 નવેમ્બરથી પર્થમાં શરૂ થનારી પાંચ ટેસ્ટ મેચની શ્રેણી માટે ભારતની યોજનાને અવરોધી શકે છે. શમીને તે શ્રેણી માટેના મુખ્ય બોલરોમાનો એક ગણવામાં આવતો હતો, પરંતુ શમી, જેમણે ફેબ્રુઆરીમાં અકિલીજ ટેન્ડનની સર્જરી કરાવી હતી, તે NCA ખાતે પુનર્વસન કાર્યક્રમ દરમિયાન ફરીથી ઈજાગ્રસ્ત થયો હતો. એવી અપેક્ષા રાખવામાં આવી રહી હતી કે, તે 11 ઓક્ટોબરથી શરૂ થનારી રણજી ટ્રોફીમાં બંગાળ માટે રમશે, પરંતુ હાલમાં તેણે પુનરાગમન પર બ્રેક લગાવવી પડશે.
