દેશના દિગ્ગજ ઉદ્યોગપતિ રતન ટાટાએ બુધવારે રાત્રે દુનિયાને અલવિદા કહી દીધું. તેમના મૃત્યુના સમાચાર મળતા જ આખો દેશ શોકમાં ડૂબી ગયો હતો. રતન ટાટાના નિધન પર દેશના PMથી લઈને તમામ હસ્તીઓએ પોતાની લાગણી વ્યક્ત કરી હતી. રતન ટાટાના પાર્થિવ દેહને અંતિમ દર્શન માટે મુંબઈના નેશનલ સેન્ટર ફોર પરફોર્મિંગ આર્ટ્સ હોલમાં રાખવામાં આવ્યો હતો. શાંતનુ નાયડુ રતન ટાટાની યાત્રામાં મોખરે જોવા મળ્યા હતા, જ્યારે તેમના પાર્થિવ દેહને હોસ્પિટલથી મુંબઈના નેશનલ સેન્ટર ફોર પરફોર્મિંગ આર્ટસ હોલમાં લઈ જવામાં આવ્યા હતા.
ભીની આંખો સાથે શાંતનુ નાયડુ બાઇક પર રતન ટાટાની અંતિમ યાત્રાનું નેતૃત્વ કરી રહ્યા હતા. તેણે આજે સવારે એક ઈમોશનલ પોસ્ટ પણ શેર કરી હતી. તેમની પોસ્ટ દ્વારા તેમણે રાષ્ટ્રીય પ્રતિભાના નિધન પર શોક વ્યક્ત કર્યો. ભારતના સૌથી મોટા સમૂહ, ટાટા સન્સના ચેરમેન એમેરિટસ રતન ટાટાનું ટૂંકી માંદગી પછી બુધવારે મોડી રાત્રે અવસાન થયું. તેઓ 86 વર્ષના હતા.
31 વર્ષીય શાંતનુ નાયડુ મુંબઈના રહેવાસી છે. શાંતનુ નાયડુએ રતન ટાટાને ખૂબ પ્રભાવિત કર્યા હતા. શાંતનુ ટાટા ટ્રસ્ટના સૌથી યુવાન મદદનીશ અને વિશ્વાસુ વ્યક્તિ હતા. 2014માં તેઓ પહેલીવાર રતન ટાટાને મળ્યા હતા, જ્યારે નાયડુએ રખડતા કૂતરાઓને રાત્રિના સમયે થતા ટ્રાફિક અકસ્માતોથી બચાવવા માટે પ્રતિબિંબીત કોલર ડિઝાઇન કર્યા હતા. આ પછી જ રતન ટાટાએ નાયડુને પોતાની ટીમમાં સામેલ કર્યા. છેલ્લા 10 વર્ષમાં શાંતનુ નાયડુ રતન ટાટાના નજીકના અને વિશ્વાસુ મિત્ર બની ગયા હતા.
ગુડફેલો સપ્ટેમ્બર 2022માં લોન્ચ કરવામાં આવ્યો હતો. આ સ્ટાર્ટઅપના સ્થાપક શાંતનુ નાયડુ 31 વર્ષના છે અને તેમણે કોર્નેલ યુનિવર્સિટીમાંથી અભ્યાસ કર્યો છે. તેઓ ટાટા ઓફિસમાં જનરલ મેનેજર તરીકે કામ કરતા હતા. આ સાથે તમને જણાવી દઈએ કે, શાંતનુ 2014થી રતન ટાટા સાથે જોડાયેલા હતા.
31 વર્ષની ઉંમરે, શાંતનુ નાયડુએ વેપાર ઉદ્યોગમાં તે સ્થાન હાંસલ કર્યું છે, જે ઘણા લોકો માટે એક સ્વપ્ન છે. શાંતનુ નાયડુ સ્ટાર્ટઅપ્સમાં રોકાણ કરવા માટે રતન ટાટાને બિઝનેસ ટિપ્સ આપતા હતા. શાંતનુ નાયડુનો જન્મ 1993માં પુણેમાં થયો હતો. તે એક પ્રખ્યાત ભારતીય ઉદ્યોગપતિ, એન્જિનિયર, જુનિયર આસિસ્ટન્ટ, DGM, સોશિયલ મીડિયા પ્રભાવક, લેખક અને ઉદ્યોગસાહસિક છે. શાંતનુ નાયડુ ટાટા ટ્રસ્ટના ડેપ્યુટી જનરલ મેનેજર પણ હતા.
પ્રાણીપ્રેમ અને સમાજ સેવાનો જુસ્સો ધરાવતા શાંતનુએ ‘મોટોપોઝ’ નામની સંસ્થા બનાવી છે, જે રસ્તાઓ પર રખડતા કૂતરાઓને મદદ કરે છે. નાયડુના નેતૃત્વ હેઠળ, મોટોપોઝ 17 શહેરોમાં વિસ્તર્યો અને 8 મહિનામાં 250 કર્મચારીઓની ભરતી કરી.
શાંતનુ નાયડુએ તેમની લિંક્ડઇન પોસ્ટમાં તેમની મિત્રતા વિશે લખતાં કહ્યું, ‘આ મિત્રતાએ મારી અંદર જે શૂન્યતા સર્જી છે, તેને ભરવા માટે હું આખી જીંદગી વિતાવી દઈશ. પ્રેમ માટે દુઃખની કિંમત ચૂકવીને. વિદાય, મારા પ્રિય લાઇટહાઉસ.’ તેમણે એક જૂની તસવીર પણ શેર કરી છે, જેમાં બંને સાથે જોવા મળે છે.
