મહારાષ્ટ્ર વિધાનસભાની ચૂંટણીનો જંગ વધુને વધુ રસપ્રદ બની રહ્યો છે. અહીં મહાયુતિ અને મહા વિકાસ અઘાડી વચ્ચે એકદમ સ્પર્ધાત્મક મુકાબલો હોવાનું કહેવાય છે. આ દરમિયાન, મહાયુતિના CM પદના ઉમેદવાર CM એકનાથ શિંદેએ તાકાત પ્રદર્શનમાં કોપરી-પચપાખડી વિધાનસભા મતવિસ્તારમાંથી ઉમેદવારી નોંધાવી હતી. આ પ્રસંગે શિવસેનાના અનેક નેતાઓ હાજર રહ્યા હતા. નામાંકન પછી તેમણે કહ્યું કે, ‘વિધાનસભા ચૂંટણીમાં ‘મહાવિકાસ અઘાડી’ના જુઠ્ઠાણા અને છેતરપિંડીથી જનતા હવે ગેરમાર્ગે દોરાશે નહીં. આ સિવાય NCP એટલે કે રાષ્ટ્રવાદી કોંગ્રેસ પાર્ટી (શરદચંદ્ર પવાર)ના વડા શરદ પવારે નામાંકન ભરવાની અંતિમ તારીખના એક દિવસ પહેલા મોટું નિવેદન આપ્યું છે.
વરિષ્ઠ પવારે કહ્યું, ‘રાજ્યની કુલ 288 બેઠકોમાંથી 90 થી 95 ટકા પર મહા વિકાસ અઘાડી (MVA) વચ્ચે સર્વસંમતિ સધાઈ છે. પત્રકારો સાથે વાત કરતી વખતે પવારે BJP પર આકરા પ્રહારો કર્યા અને કહ્યું કે, તેમની લડાઈ હરીફ રાજકીય પક્ષોમાં વિભાજન કરનારા અને તેમની વિચારધારા સાથે સમાધાન કરનારાઓ સામે છે.
તેમણે દાવો કર્યો કે, સત્તામાં બેઠેલા નેતાઓએ લોકોની સમસ્યાઓ હલ કરી નથી. મહારાષ્ટ્રમાં વિધાનસભા ચૂંટણી માટે 20 નવેમ્બરે મતદાન થશે અને 23 નવેમ્બરે મતગણતરી થશે. ઉમેદવારી પત્ર ભરવાની છેલ્લી તારીખ 29 ઓક્ટોબર છે. MVAમાં NCP (SP), કોંગ્રેસ અને ઉદ્ધવ ઠાકરેની આગેવાની હેઠળની શિવસેના (ઉદ્ધવ બાળાસાહેબ ઠાકરે)નો સમાવેશ થાય છે.
શિવસેના જૂન 2022માં બે જૂથોમાં વિભાજિત થઈ, જેના કારણે ઠાકરેની આગેવાની હેઠળની MVA સરકાર પડી, જ્યારે NCP, શરદ પવાર દ્વારા સ્થાપિત, જ્યારે તેમના ભત્રીજા DyCM અજિત પવાર જુલાઈ 2023માં શાસક ગઠબંધનમાં જોડાયા ત્યારે વિભાજિત થઈ.
શરદ પવારે કહ્યું કે, ‘જેઓ સત્તામાં છે તેમણે લોકોની સમસ્યાઓ હલ કરી નથી. અમે એવા લોકો સામે લડી રહ્યા છીએ, જેમણે રાજકીય પક્ષોમાં વિભાજન કર્યું, તેમની વિચારધારા સાથે બિનજરૂરી સમજૂતી કરી અને જે ન કરવું જોઈતું હતું તે કર્યું.’
‘લાડલી બહેન’ યોજના જેવી સરકારની કલ્યાણકારી યોજનાઓને કારણે ચૂંટણીમાં વિપક્ષ માટે સંભવિત પડકારો વિશે પૂછવામાં આવતાં શરદ પવારે કહ્યું કે, જેઓ આટલા લાંબા સમયથી સત્તામાં છે તેઓએ આવી કોઈ યોજના બનાવી નથી.
ભૂતપૂર્વ CMએ દાવો કર્યો હતો કે, આ વર્ષની શરૂઆતમાં લોકસભાની ચૂંટણીમાં શાસક મહાયુતિને મોટો ફટકો પડ્યો તે પછી જ ‘લાડલી બહેન’ યોજના શરૂ કરવામાં આવી હતી. લોકસભા ચૂંટણીમાં, MVA રાજ્યની કુલ 48 બેઠકોમાંથી 31 બેઠકો જીતી હતી.
દરમિયાન શિવસેના UBTના નેતા સંજય રાઉતે કોંગ્રેસને સોલાપુર દક્ષિણ બેઠક પરથી ઉમેદવાર ઉતારવા સામે ચેતવણી આપી છે. શિવસેના-ઉદ્ધવ બાળાસાહેબ ઠાકરે (UBT)ના નેતા સંજય રાઉતે સોમવારે કોંગ્રેસને સોલાપુર દક્ષિણ વિધાનસભા બેઠક પરથી ઉમેદવાર ઉતારવા સામે ચેતવણી આપતાં કહ્યું કે, શિવસેના UBTએ પહેલા જ આ બેઠક પર પોતાનો ઉમેદવાર ઉતારવાની જાહેરાત કરી દીધી છે.
રાઉતે કહ્યું, ‘કોંગ્રેસ તરફથી આવી કાર્યવાહી જો થઇ તો, તેની પાર્ટી પણ આવા કામ કરી શકે છે, જેના કારણે મહાવિકાસ અઘાડી (MVA) માટે ‘સમસ્યાઓ’ ઊભી થઈ શકે છે. કોંગ્રેસે તેની નવી યાદીમાં સોલાપુર દક્ષિણ બેઠક પરથી ઉમેદવાર (દિલીપ માને)ની જાહેરાત કરી છે. આ ત્યારે થયું જ્યારે અમે પહેલાથી જ અમારા ઉમેદવાર (અમર પાટીલ)ને એ જ સીટ પર ઉતાર્યા છે. હું આને કોંગ્રેસની ‘ટાઈપિંગ મિસ્ટેક’ માનું છું. આવી ભૂલ અમારા તરફથી પણ થઈ શકે છે.’
રાઉતે કહ્યું, ‘મેં સાંભળ્યું છે કે સ્થાનિક કોંગ્રેસના નેતાઓ મિરાજ વિધાનસભા મતવિસ્તારમાંથી ચૂંટણી લડવા આતુર છે, જે અમારી નિશ્ચિત બેઠક વહેંચણીનો ભાગ છે. જો આ વાત (સાથી પક્ષો સામે ઉમેદવારો ઉતારવાની) રાજ્યભરમાં ફેલાઈ જશે તો તે ગઠબંધન માટે મુશ્કેલી ઊભી કરશે.’
