તેલંગાણાના સીનિયર IAS અધિકારી સ્મિતા સભરવાલ એક મુશ્કેલીમાં ફસાઈ ગયા છે. આ મુશ્કેલી AIથી બનાવવામાં આવેલી તસવીરને રીટ્વીટ કરવાને કારણે થઈ. સાયબરાબાદ પોલીસે તેમને નોટિસ મોકલી છે. આ નોટિસ કાંચા ગચ્ચીબાવલી જમીન વિવાદમાં ખોટી માહિતી ફેલાવવાના આરોપમાં મોકલવામાં આવી છે. સ્મિતા સભરવાલે X (અગાઉ ટ્વીટર) પર એક તસવીર રીટ્વીટ કરી હતી. તેમાં વિવાદિત ભૂખંડની AI-જનરેટેડ તસવીર હતી, જેમાં 2 JCB મશીન, 2 હરણ અને એક મોર નજરે પડી રહ્યા હતા.
શું છે મામલો?
વાસ્તવમાં, છેલ્લા કેટલાક દિવસોથી કાંચા ગચ્ચીબાવલી જમીનને લઈને વિવાદ ચાલી રહ્યો છે. સરકાર લગભગ 400 એકર જમીન પર વિકસ કરવા માગે છે, પરંતુ વિદ્યાર્થીઓનું કહેવું છે કે, આ જમીન હૈદરાબાદ યુનિવર્સિટીની છે. પર્યાવરણવિદોએ પણ વિરોધ કર્યો છે. તેમનું કહેવું છે કે આ વન ભૂમિ છે અને અહીં દુર્લભ વૃક્ષો, છોડ અને પ્રાણીઓ છે. સુપ્રીમ કોર્ટે આ મામલે હસ્તક્ષેપ કર્યો અને બાંધકામ કાર્ય પર રોક લગાવી દીધી. આ દરમિયાન, સોશિયલ મીડિયા પર કેટલીક તસવીર અને વીડિયો વાયરલ થયા. તેમાં બતાવવામાં આવ્યું કે, બુલડોઝરથી તોડ-ફોડ કરવામાં આવી રહી છે. લોકોએ કહ્યું કે પર્યાવરણને નુકસાન થઈ રહ્યું છે અને પ્રાણીઓનું ઘર છીનવાઈ રહ્યું છે. સરકારે તેના પર સખત આપત્તિ દર્શાવી.
સરકારનું કહેવું છે કે કેટલાક લોકો AIથી બનેલા વીડિયો અને તસવીરના મધ્યમથી ખોટી માહિતી ફેલાવી રહ્યા છે. સરકારે એવો પણ આરોપ લગાવ્યો કે તેની પાછળ વિપક્ષી પાર્ટીઓના લોકો છે. સરકારે કહ્યું કે, વાયરલ થઈ રહેલી મોટાભાગની પોસ્ટ નકલી છે. ત્યારબાદ કેટલાક લોકોએ પોતાની પોસ્ટ હટાવી દીધી. કાંચા ગચ્ચીબાવલીની જમીનને લઈને ખોટી માહિતી ફેલાવવાના આરોપમાં પોલીસે કેટલીક યુટ્યુબ ચેનલો, ન્યૂઝ વેબસાઇટ્સ અને લોકોને નોટિસ મોકલી છે. સ્મિતા સભરવાલે પણ એક ઘિબલી તસવીરને રીટ્વીટ કરી હતી. એટલે, તેમને પણ નોટિસ મોકલવામાં આવી છે. IAS સ્મિતા સભરવાલે 31 માર્ચે ‘હાય હૈદરાબાદ’ નામના એક X (ટ્વીટર) એકાઉન્ટ પરથી પોસ્ટ કરવામાં આવેલી ઘિબલીની તસવીરને રીટ્વીટ કરી હતી.
આ તસવીરમાં, હૈદરાબાદ સેન્ટ્રલ યુનિવર્સિટીના ‘મશરૂમ રોક’ સામે ઘણા બધા બુલડોઝર હતા. તેમની સામે ઘિબલી સ્ટાઈલમાં એક મોર અને 2 હરણ પણ હતા. પોલીસે કહ્યું કે આ તસવીર નકલી છે. ગચ્ચીબાવલી પોલીસ સ્ટેશનના SHO મોહમ્મદ હબીબુલ્લાહ ખાને જણાવ્યું કે BNSS એક્ટની કલમ 179 હેઠળ સ્મિતા સભરવાલને નોટિસ મોકલવામાં આવી છે. તેમણે આ પોસ્ટ રીટ્વીટ કરી હતી. હવે જોવાનું એ રહશે કે સ્મિતા સભરવાલ આ નોટિસ પર શું જવાબ આપે છે?