28 મે, 2025ના રોજ, એક ભયંકર કુદરતી આફતથી સ્વિટ્ઝર્લૅન્ડના સુંદર બ્લેટન ગામમાં ખુબ જ વિનાશ થયો. બિર્ચ ગ્લેશિયરનો મોટો ભાગ તૂટીને ગામ પર પડ્યો, જેના કારણે બરફ, કાદવ અને ખડકોનું પૂર આવ્યું. ગામનો 90 ટકા ભાગ કાટમાળ નીચે દટાઈ ગયો. બાકીના ઘરો પાણીમાં ડૂબી ગયા. વૈજ્ઞાનિકો માને છે કે આ આબોહવા પરિવર્તનનું ખતરનાક પરિણામ છે.
બ્લેટન સ્વિટ્ઝર્લૅન્ડના વૉલિસ પ્રદેશમાં લોટશેન્ટલ ખીણમાં એક નાનું ગામ છે, જે બિટ્સહોર્ન પર્વતની નીચે સ્થિત છે. 28 મે, 2025ના રોજ, બપોરે 3:30 વાગ્યે, બિર્ચ ગ્લેશિયરનો એક મોટો ભાગ (લગભગ 15 લાખ ઘન મીટર) તૂટીને ગામ પર પડ્યો.
આ હિમપ્રપાતમાં, બરફ, કાદવ અને ખડકોએ ગામને સંપૂર્ણપણે દાટી દીધું. સોશિયલ મીડિયા પર વાયરલ થયેલા ડ્રોન અને વીડિયોમાં બતાવવામાં આવ્યું હતું કે, કેવી રીતે એક વિશાળ ધૂળના વાદળ ગામને ઢાંકી રહ્યા હતા. 19 મેના રોજ ગામના 300 રહેવાસીઓને પહેલાથી જ સ્થળાંતરિત કરવામાં આવ્યા હતા, કારણ કે વૈજ્ઞાનિકોએ ચેતવણી આપી હતી કે ગ્લેશિયર અસ્થિર છે, 64 વર્ષનો એક વ્યક્તિ તેમાં ગુમ થયો છે. ગુરુવારે (29 મે) કાટમાળ ખૂબ અસ્થિર હોવાથી તેમની શોધખોળ અટકાવી દેવામાં આવી હતી.
હિમપ્રપાતથી લોન્ઝા નદી અવરોધાઈ ગઈ હતી, જેના કારણે એક મોટું કૃત્રિમ તળાવ બની ગયું હતું. તળાવનું પાણી દર કલાકે 80 સેન્ટિમીટર વધી રહ્યું છે, જેનાથી બચી ગયેલા ઘરોમાં પાણી ભરાઈ ગયું છે. નજીકના ગામડાઓમાંથી પણ કેટલાક લોકોને બહાર કાઢવામાં આવ્યા હતા.
વાલિસ સુરક્ષા વડા સ્ટેફન ગેન્ઝરે કહ્યું કે, જો આ કાટમાળ ફર્ડોન ડેમ તોડી નાખે છે, તો વધુ વિનાશ થઈ શકે છે. પરંતુ ડેમ પહેલાથી જ ખાલી કરી દેવામાં આવ્યો છે, જેથી તે વધારાનું પાણી રોકી શકે. 50 સ્વિસ આર્મી જવાનો, પાણીના પંપ અને ભારે મશીનરી રાહત કાર્ય માટે તૈયાર છે.
વૈજ્ઞાનિકો કહે છે કે, આ આપત્તિ આબોહવા પરિવર્તનને કારણે થઈ છે. સ્વિટ્ઝર્લૅન્ડમાં હિમનદીઓ ઝડપથી પીગળી રહી છે. પર્માફ્રોસ્ટ (હંમેશા થીજી ગયેલી માટી) પણ પીગળી રહી છે. આ પર્માફ્રોસ્ટ એક ‘ગુંદર’ જેવું કામ કરે છે, જે પર્વતોને સ્થિર રાખે છે. જ્યારે તે પીગળે છે, ત્યારે ખડકો અને હિમનદીઓ અસ્થિર બની જાય છે.
સ્વિટ્ઝર્લૅન્ડના ગ્લેશિયર મોનિટરિંગના વડા મેથિયાસ હસે જણાવ્યું હતું કે, આવી ઘટનાઓ સેંકડો વર્ષોમાં જોવા મળી નથી. આ આબોહવા પરિવર્તનનું પરિણામ છે. 1970ના દાયકાથી સ્વિસ આલ્પ્સનું તાપમાન 3 ડિગ્રી સેલ્સિયસ વધ્યું છે. 2000થી 40 ટકા ગ્લેશિયર પીગળી ગયા છે. 2022 અને 2023માં 10 ટકા બરફનું નુકસાન થયું છે.
— News
#Switzerland #blatten #landslide
1 Pomona – Flight over the Birch Glacier near the Kleines Nesthorn in Blatten (Lötschental)
(@EUFreeCitizen) May 29, 2025
બ્લેટેનના મેયર મેથિયાસ બેલવાલ્ડે કહ્યું કે, અમે અમારું ગામ ગુમાવ્યું છે, પરંતુ અમારો ઉત્સાહ તૂટ્યો નથી. અમે ફરીથી બનાવીશું. પરંતુ રહેવાસીઓ માટે આ આઘાત ખૂબ મોટો છે. એક મહિલાએ કહ્યું કે, મેં ગઈકાલે બધું ગુમાવ્યું. નજીકના ગામ રીડના વર્નર બેલવાલ્ડે કહ્યું કે, 1654માં બનેલું તેમનું પૂર્વજોનું ઘર પણ કાટમાળ નીચે દટાઈ ગયું હતું. તેમણે કહ્યું કે, એવું લાગે છે કે, જાણે ત્યાં ક્યારેય કોઈ વસાહત જ નહોતી.
સ્વિટ્ઝર્લૅન્ડમાં આવી દુર્ઘટના પહેલીવાર બની નથી. 2023માં, પૂર્વી સ્વિટ્ઝર્લૅન્ડના બ્રિએન્ઝ ગામને પણ હિમપ્રપાતના ડરથી ખાલી કરાવવામાં આવ્યું હતું. 2017માં બોન્ડો ગામમાં હિમપ્રપાતથી આઠ લોકો માર્યા ગયા હતા. ભારતમાં પણ 2013માં કેદારનાથ અને 2023માં સિક્કિમના દક્ષિણ લોનાક ગ્લેશિયરમાં આવી આફતોને ભારે નુકસાન થયું હતું.
રાહત કાર્ય: સ્વિસ સેના અને સ્થાનિક અધિકારીઓ કાટમાળ દૂર કરવા અને પૂરનો સામનો કરવાનો પ્રયાસ કરી રહ્યા છે. હેલિકોપ્ટર દ્વારા પશુઓને સલામત સ્થળોએ લઈ જવામાં આવ્યા હતા.
સરકારી મદદ: સ્વિસ રાષ્ટ્રપતિ કરીન કેલર-સટર બ્લેટનની મુલાકાત લેશે. સરકારે અસરગ્રસ્ત લોકો માટે નાણાકીય મદદનું વચન આપ્યું છે.
ચેતવણી પ્રણાલી: વૈજ્ઞાનિકોએ પહેલાથી જ ગ્લેશિયરની અસ્થિરતા અંગે ચેતવણી આપી હતી, જેના કારણે ગામ ખાલી કરાવવામાં આવ્યું હતું. આનાથી ઘણા લોકોના જીવ બચી ગયા.
આ ઘટના આબોહવા પરિવર્તનનું એક ઉત્તમ ઉદાહરણ છે. વૈજ્ઞાનિકો કહે છે કે, જો ગ્રીનહાઉસ ગેસ ઉત્સર્જન બંધ ન કરવામાં આવે તો, સ્વિટ્ઝર્લૅન્ડના હિમનદીઓ 2100 સુધીમાં સંપૂર્ણપણે અદૃશ્ય થઈ શકે છે. 2024ને રેકોર્ડ પરનું સૌથી ગરમ વર્ષ માનવામાં આવતું હતું, જેણે હિમનદીઓને વધુ નબળા પાડ્યા હતા.
બ્લેટન ગામની વિનાશએ સમગ્ર વિશ્વને આબોહવા પરિવર્તનના જોખમોની યાદ અપાવી દીધી. 300 લોકો બેઘર બન્યા. એક વ્યક્તિ હજુ પણ ગુમ છે. પરંતુ રહેવાસીઓનું મનોબળ અકબંધ છે. આ ઘટના આપણને કહે છે કે, પર્યાવરણના રક્ષણ માટે હવે પગલાં લેવા પડશે, નહીં તો આવી આફતો વધુ વધશે.