4.jpg?w=1110&ssl=1)
તમિલનાડુના કૃષ્ણાગિરી જિલ્લાના કેલમંગલમ વિસ્તારમાં એક ચોંકાવનારો બનાવ સામે આવ્યો છે. અહીં એક 38 વર્ષીય પતિએ પોતાની પત્ની અને તેની કથિત લેસ્બિયન પાર્ટનર પર તેના 5 મહિનાના દીકરાની ગળું દબાવીને હત્યા કરવાનો ગંભીર આરોપ લગાવ્યો છે. મામલો સામે આવ્યા બાદ પોલીસે બંને મહિલાઓની ધરપકડ કરીને વધુ તપાસ શરૂ કરી છે.
શું છે સમગ્ર મામલો?
ચીન્નાટ્ટી ગામના રહેવાસી સુરેશ એક દૈનિક મજૂર છે અને તેના લગ્ન 26 વર્ષીય ભારતી સાથે થયા હતા. આ દંપતીને બે દીકરીઓ (5 વર્ષ અને 4 વર્ષ) અને પાંચ મહિના પહેલા જ એક દીકરાનો જન્મ થયો હતો.
સુરેશના જણાવ્યા અનુસાર, 5 નવેમ્બરના રોજ તેને જાણ કરવામાં આવી કે બાળક અચાનક બેહોશ થઈ ગયો છે. તેને કેલમંગલમની સરકારી હોસ્પિટલ લઈ જવામાં આવ્યો, જ્યાં ડોકટરોએ તપાસ બાદ તેને મૃત જાહેર કર્યો.
બાદમાં પરિવારે બાળકનાં અંતિમ સંસ્કાર પણ કરી દીધા હતા.
પતિને કંઈ રીતે થઈ શંકા?
ઘટનાના થોડા દિવસો પછી સુરેશને પોતાની પત્ની ભારતી પર શંકા ગઈ.
તેણે ભારતીનો ફોન ચેક કર્યો, જેમાં કથિત રીતે ફોટો, ચેટ્સ અને વોઇસ મેસેજ મળ્યા હતા.
આ પુરાવા મળ્યા બાદ સુરેશે તાત્કાલિક કેલમંગલમ પોલીસને જાણ કરી.
ત્રણ વર્ષથી ચાલતો હતો સંબંધ
પોલીસ સૂત્રોના જણાવ્યા મુજબ, ભારતીનો સુમિત્રા નામની મહિલા સાથે છેલ્લા ત્રણ વર્ષથી સંબંધ ચાલી રહ્યો હતો.
ત્રીજા બાળકના જન્મ પછી બંને મહિલાઓની મુલાકાતો ઓછી થઈ ગઈ હતી, જેના કારણે તેમના સંબંધોમાં તણાવ વધ્યો હતો.
આ જ તણાવના કારણે ભારતી પર આરોપ છે કે તેણે પોતાના 5 મહિનાના દીકરાને ગળું દબાવીને મારી નાખ્યો.
ફોન કૉલમાં પત્નીએ હત્યાની કબૂલાત કરી
સુરેશે પોલીસને એક ફોન કૉલની રેકોર્ડિંગ પણ સોંપી છે.
તેના કહેવા મુજબ, આ કૉલમાં ભારતીએ બાળકને મારી નાખ્યો હોવાની વાત સ્વીકારી છે.
પત્ની અને તેની પાર્ટનર બંનેની ધરપકડ
પોલીસે સુરેશની ફરિયાદ અને ડિજિટલ પુરાવાઓના આધારે ભારતી અને તેની કથિત પાર્ટનર સુમિત્રાની ધરપકડ કરી લીધી છે.
પોલીસનું કહેવું છે કે કેસની આગળની તપાસ ચાલુ છે.
