બ્રાઝિલિયન મોડેલ લૈરિસા નેરીએ તેના ફોટાનો ગેરકાયદેસર ઉપયોગ અંગે ચિંતા વ્યક્ત કરી છે. તેને ડર છે કે આ વાયરલ લોકપ્રિયતા ક્યાંક તેની કારકિર્દીને બગાડી ન દે. આના ઉકેલ માટે, તેણે કાનૂની મદદ માંગી છે. આ અગાઉ, રાહુલ ગાંધીએ દાવો કર્યો હતો કે, હરિયાણા વિધાનસભા મતદાર યાદીમાં બ્રાઝિલિયન મોડેલનો ફોટો ઘણી વખત ઉપયોગમાં લેવાયો હતો. ત્યાર પછી, એવું જાણવા મળ્યું કે તે ફોટો વ્યવસાયે મોડેલ લૈરિસા નેરીનો છે.
લૈરિસા નેરી, જે અચાનક વાયરલ થઈ ગઈ, તેને ડર છે કે આનાથી તેની કારકિર્દી અને અંગત જીવનને નુકસાન થઈ શકે છે. મીડિયા સૂત્રોના અહેવાલ મુજબ, નેરીના વકીલો હવે તેના ફોટાના ગેરકાયદેસર ઉપયોગને રોકવા માટે કાનૂની વિકલ્પો શોધી રહ્યા છે.
5 નવેમ્બરના રોજ, ‘મત ચોરી’ના મુદ્દા પર એક પ્રેસ કોન્ફરન્સ દરમિયાન, રાહુલ ગાંધીએ BJP અને ચૂંટણી પંચ પર ગંભીર આરોપો લગાવ્યા. તેઓએ સ્ક્રીન પર એક મહિલાનો ફોટો પ્રદર્શિત કર્યો, જેમાં દાવો કરવામાં આવ્યો હતો કે, તેણે હરિયાણા ચૂંટણીમાં અલગ અલગ નામોથી 22 વખત મતદાન કર્યું છે. ક્યારેક તે સ્વીટી, ક્યારેક સીમા, ક્યારેક સરસ્વતી, ક્યારેક રશ્મિ, તો ક્યારેક વિમલા હતી.
પાછળથી, એવું બહાર આવ્યું કે તે ફોટો કોઈ ભારતીય મહિલાનો નહીં, પરંતુ બ્રાઝિલિયન મોડેલ લૈરિસા નેરીનો હતો, જેનો ઉપયોગ તેની પરવાનગી વિના કરવામાં આવ્યો હતો. લૈરિસા નેરીએ પણ આ મુદ્દા પર પ્રતિક્રિયા આપતા સ્પષ્ટતા કરી, ‘મારે ભારતીય રાજકારણ સાથે કોઈ લેવાદેવા નથી.’ તેણે સમજાવ્યું કે મતદાર યાદીમાં વપરાયેલ ફોટો સ્ટોક ઇમેજ પ્લેટફોર્મ પરથી ખરીદવામાં આવ્યો હતો અને તેની સંમતિ વિના ઉપયોગમાં લેવામાં આવ્યો હતો.
બ્રાઝિલની એક ટેલિવિઝન ચેનલ અનુસાર, લૈરિસા થોડા દિવસો પહેલા વર્ચ્યુઅલ રીતે અનામી હતી. સોશિયલ મીડિયા પર તેના ફક્ત 2,000થી વધુ ફોલોઅર્સ હતા. ભારતીય પ્લેટફોર્મ પર વાયરલ થયા પછી, તેના ફોલોઅર્સ લગભગ 8,000 સુધી પહોંચી ગયા, જેમાંથી મોટાભાગના ભારતના હતા. ત્યારથી, ભારતીય અખબારોમાં તેના વિશે અસંખ્ય મીમ્સ અને કાર્ટૂન છપાયા છે.
જોકે, આ અચાનક લોકપ્રિયતાએ તેને હચમચાવી દીધી છે. અહેવાલો જણાવે છે કે, લૈરિસા આ આરોપોથી ચોંકી ગઈ છે અને ડર છે કે વાયરલ હેડલાઇન્સ તેની પ્રોફેશનલ ઇમેજને નુકસાન પહોંચાડી શકે છે. તેથી, તેણે કાનૂની મદદ માંગી છે.
એક સાયબર ક્રાઇમ નિષ્ણાતે સમજાવ્યું, ‘ભાવનાત્મક અને વ્યાવસાયિક બંને રીતે તેની અસર ખૂબ મોટી છે. જ્યારે કોઈના ફોટાનો ઉપયોગ કોઈપણ હેતુ માટે કરવામાં આવે છે, પછી ભલે તે કાયદેસર હોય કે ન હોય, તે તેમના અંગત અધિકારોનું ઉલ્લંઘન કરે છે. આવું ન થઈ શકે.’
બ્રાઝિલમાં ભારતીય દૂતાવાસે હજુ સુધી આ બાબતે કોઈ નિવેદન બહાર પાડ્યું નથી.
