સદ્ગુરુજીનો આ પ્રેરણાદાયી સુવિચાર છે: “આધ્યાત્મિક બનવા માટે તમારે કોઈ પર્વતની ગુફામાં જવાની જરૂર નથી. આધ્યાત્મિકતાનો સંબંધ બહારથી નહીં પરંતુ તમારા અંદરથી છે.”
આજના વ્યસ્ત જીવનમાં ઘણા લોકો આધ્યાત્મિકતાને દૂરના સ્થળો સાથે જોડી દે છે. હિમાલયની ગુફાઓ કે જંગલોમાં જઈને શાંતિ મળશે એમ માને છે. પરંતુ સદ્ગુરુજી આ ભ્રમને તોડે છે. તેમના મતે સાચી આધ્યાત્મિકતા બાહ્ય જગતમાં નહીં અંતર્જગતમાં વસે છે. તે તમારા વિચારો, લાગણીઓ અને ઊર્જાને સમજવાની અને શુદ્ધ કરવાની પ્રક્રિયા છે.
આપણે બહારના તણાવથી ભાગીએ છીએ પણ તણાવનું મૂળ તો અંદર જ છે. યોગ, ધ્યાન અને સાધના દ્વારા અંતરને શાંત કરીએ તો રોજિંદા જીવનના કામ, પરિવાર કે સંબંધો પણ આનંદમય બની જાય છે. આધ્યાત્મિકતા જીવનથી અલગ થવું નથી બલ્કે તેને વધુ સુંદર અને સશક્ત બનાવવાની પ્રક્રિયા છે.
સદ્ગુરુજીના આ શબ્દો આપણને યાદ અપાવે છે કે ઈશ્વર કે શાંતિ દૂર નથી તે તો તમારા હૃદયમાં જ વસે છે. આજથી જ અંદરની યાત્રા શરૂ કરો!
