સહારનપુરના બિહારીગઢ પોલીસ સ્ટેશને દિલ્હી-દહેરાદૂન એક્સપ્રેસવેની દિવાલો પર ‘આ રસ્તો મુસ્લિમો માટે નથી’ જેવા વિવાદાસ્પદ સૂત્રો લખવા બદલ ત્રણ લોકોની ધરપકડ કરી છે. ધરપકડ કરાયેલા આરોપીઓમાં સુલેખા, શારદા અને માનવ કેન્દ્ર (જિતેન્દ્ર રાઘવ)નો સમાવેશ થાય છે, જે દેહરાદૂન રહેવાસી છે અને હિન્દુ રક્ષા દળ સાથે સંકળાયેલા હોવાનું કહેવાય છે.
અહીં તમને જણાવી દઈએ કે, આ વ્યક્તિઓએ 26 ફેબ્રુઆરીએ એક્સપ્રેસવે પર નફરતભર્યા સંદેશાઓ સ્પ્રે પેઇન્ટ કર્યા હતા, જેનો એક વીડિયો સોશિયલ મીડિયા પર વાયરલ થયો હતો. NHAI કર્મચારીની ફરિયાદના આધારે, પોલીસે ગુરુવારે સાંજે શાંતિ ખલેલ પહોંચાડવા અને રમખાણો ભડકાવવાના કાવતરાની કલમો હેઠળ કાર્યવાહી કરી હતી. સ્થાનિક રહેવાસીઓના જણાવ્યા અનુસાર, હાઇવેનું ઉદ્ઘાટન આવતા મહિને થવાનું છે, જે ઉદ્ઘાટન પહેલાં આવા વિવાદાસ્પદ સૂત્રો પોસ્ટ કરવા અંગે પ્રશ્નો ઉભા કરે છે.
આખો મામલો 26 ફેબ્રુઆરીએ શરૂ થયો હતો, જ્યારે એક્સપ્રેસવેનો એક વીડિયો સામે આવ્યો હતો. આ ઘટનામાં, કેટલાક લોકો હાઇવેની દિવાલો પર ખુલ્લેઆમ કોમી સૂત્રો લખી રહ્યા હતા. હિન્દુ રક્ષા દળ (હિન્દુ પ્રોટેક્શન ફોર્સ)ના સભ્યોએ આ ઘટનાની જવાબદારી સ્વીકારી હતી. એક સમાચાર એજન્સીના જણાવ્યા અનુસાર, આરોપી મહિલાઓની ઓળખ થઈ ચૂકી હતી, પરંતુ પોલીસે હવે નક્કર પુરાવાના આધારે તેમની ધરપકડ કરી છે.
આ દરમિયાન, ગાઝિયાબાદ સ્થિત હિન્દુત્વ નેતા પિંકી ચૌધરીએ ટ્વિટર પર એક પોસ્ટમાં આ કૃત્યને યોગ્ય ઠેરવ્યું. તેમણે લખ્યું કે હિન્દુ રક્ષા દળના કાર્યકરો રાષ્ટ્રીય ધોરીમાર્ગ પર જે લખ્યું હતું તે સાચું હતું, કારણ કે રસ્તાઓ બધા હિન્દુઓના કરથી બને છે. પોસ્ટમાં એવો પણ દાવો કરવામાં આવ્યો હતો કે, જે લોકો કર ચૂકવતા નથી તેમને રાષ્ટ્રીય ધોરીમાર્ગ પર મુસાફરી કરવાનો કોઈ અધિકાર નથી.
બિહારીગઢના SHO અક્ષય શર્માએ જણાવ્યું હતું કે, ધરપકડ કરાયેલા ત્રણ આરોપીઓ 25થી 30 વર્ષની વચ્ચેના છે. પોલીસનું કહેવું છે કે, આ લોકોએ જાણી જોઈને એવી ભાષાનો ઉપયોગ કર્યો છે જે સાંપ્રદાયિક સૌહાર્દને ખલેલ પહોંચાડી શકે છે. પોલીસ આને રમખાણો ભડકાવવાનું ઇરાદાપૂર્વકનું કાવતરું માને છે. આરોપીઓને કોર્ટમાં રજૂ કર્યા પછી, તેમને જેલ મોકલવાની પ્રક્રિયા પૂર્ણ થઈ ગઈ છે.
