વિજય બનશે CM, ડ્રામા બાદ VCKએ પણ સમર્થન આપી દીધું

તમિલનાડુમાં સરકાર રચવાને લઈને ચાલી રહેલા સસ્પેન્સ વચ્ચે ફાઈનલી વિજયને VCKએ પણ સમર્થન આપી દીધું છે અને વિજયને બહુમતિ મળી ગઈ છે, એટલે હવે કોઈ તેમને મુખ્યમંત્રી બનતા હાલ તો નહીં રોકી શકે. વિદુથલાઈ ચિરુથાઈગલ કાચી (VCK) ના ડેપ્યુટી જનરલ સેક્રેટરી વન્નીયારાસુએ એક મહત્વપૂર્ણ નિવેદન આપ્યું છે. તેમણે ભારપૂર્વક જણાવ્યું છે કે તેમની પાર્ટી રાજ્યમાં લોકશાહી મૂલ્યોની જાળવણી અને જનતાના શાસનને પ્રાધાન્ય આપી રહી છે.

વન્નીયારાસુએ સોશિયલ મીડિયા પ્લેટફોર્મ ‘X’ પર કરેલી પોસ્ટ અને મીડિયા સમક્ષની વાતચીતમાં જણાવ્યું હતું કે, જો કોઈ અમને હાંસિયામાં ધકેલવાનો કે અલગ કરવાનો પ્રયાસ કરશે, તો પણ અમે એક કેન્દ્રીય શક્તિ તરીકે ઉભરીશું. આ નિવેદન એવા સમયે આવ્યું છે જ્યારે તમિલનાડુમાં ‘હંગ એસેમ્બલી’ (ત્રિશંકુ વિધાનસભા) જેવી સ્થિતિ સર્જાઈ છે.

વન્નીયારાસુએ સ્પષ્ટ કર્યું કે રાજ્યમાં રાજકીય અનિશ્ચિતતાનો અંત આવવો જોઈએ જેથી જનતા દ્વારા ચૂંટાયેલું શાસન સુચારુ રીતે ચાલી શકે. VCK ના સૂત્રો મુજબ, પાર્ટી વિજયની TVK ને સમર્થન આપવા તરફ ઝુકેલી છે જેથી રાજ્યમાં રાજ્યપાલનું શાસન અથવા રાષ્ટ્રપતિ શાસન લાદવાની નોબત ન આવે. અગાઉ વન્નીયારાસુએ જાહેરમાં નાયબ મુખ્યમંત્રી (Deputy CM) પદ અને કેબિનેટમાં હિસ્સો માંગ્યો હતો, જે દર્શાવે છે કે VCK માત્ર બહારથી ટેકો આપવાને બદલે સરકારમાં સક્રિય ભૂમિકા ભજવવા માંગે છે. તેમણે દાવો કર્યો કે વર્તમાન ગણિતમાં VCK નિર્ણાયક ભૂમિકા (Kingmaker) ભજવી રહી છે અને તેમના વગર બહુમતીનો આંકડો મેળવવો મુશ્કેલ છે.

નવું રાજકીય સમીકરણ: બહુમતીનો આંકડો

વન્નીયારાસુ અને VCK ના સમર્થન સાથે વિજયની TVK ગઠબંધનનું ગણિત હવે આ રીતે દેખાઈ રહ્યું છે:

પક્ષ	બેઠકો
TVK (વિજય)	107 (1 બેઠક ખાલી કર્યા પછી)
કોંગ્રેસ	05
CPI	02
CPI (M)	02
VCK (વન્નીયારાસુની પાર્ટી)	02
કુલ	118 (બહુમતીનો જાદુઈ આંકડો)

તમિલનાડુમાં સરકારની રચનાના નાટકનો અંત લાવતા, VCK એ સી. જોસેફ વિજયની તમિલગા વેત્રી કઝગમ (TVK) ને ટેકો આપવાનો નિર્ણય લીધો છે. આ જાહેરાત VCK ના એક ટોચના નેતાએ ધ હિન્દુને આપી હતી.