મહારાષ્ટ્રના રાજકારણમાં શિવસેના (UBT)ના વડા ઉદ્ધવ ઠાકરેની મુશ્કેલીઓ ઓછી થતી જ નથી. મંગળવારે, ઉદ્ધવ જૂથને વધુ એક મોટો ફટકો પડ્યો. પાર્ટીના MLC સચિન આહિર ઠાકરેનો પક્ષ છોડીને DyCM એકનાથ શિંદેની આગેવાની હેઠળની શિવસેનામાં જોડાઈ ગયા છે.
શિંદે જૂથમાં જોડાયા પછી તરત જ, સચિન આહિરે એક મોટું પગલું ભર્યું. તેમણે મહારાષ્ટ્ર વિધાન પરિષદના ઉપાધ્યક્ષ પદ માટે મહાયુતિના ઉમેદવાર તરીકે પોતાનું નામાંકન પણ ભરી દીધું.
વિધાન પરિષદ પહેલાં, ઉદ્ધવ ઠાકરેને લોકસભામાં પણ ખુબ મોટું નુકસાન થયું હતું. તાજેતરમાં, શિવસેના (UBT)ના 9 લોકસભા સાંસદોમાંથી 6 DyCM એકનાથ શિંદેની શિવસેનામાં જોડાયા. આ બળવાથી ઠાકરેની પાર્ટીને ભારે ફટકો પડ્યો છે. પક્ષપલટો કરનારા એ 6 સાંસદો નીચે પ્રમાણે છે….
સંજય હરિભાઉ જાધવ, સંજય દિના પાટિલ, ભાઉસાહેબ રાજારામ વાકચૌરે, સંજય ઉત્તમરાવ દેશમુખ, નાગેશ પાટિલ અશ્તિકર અને ઓમરાજે નિમ્બાલકર.
આ 6 સાંસદોના ગયા પછી, ઉદ્ધવ ઠાકરે જૂથ પાસે હવે લોકસભામાં ફક્ત 3 સાંસદો જ બાકી રહ્યા છે. જ્યારે, DyCM એકનાથ શિંદેના નેતૃત્વ હેઠળની શિવસેનાએ પોતાના સાંસદોની સંખ્યા વધારીને 13 કરી દીધી છે. 2024ની લોકસભા ચૂંટણી પછી ઉદ્ધવ ઠાકરે છાવણીમાં આ પહેલું મોટું સંસદીય વિભાજન માનવામાં આવે છે.
આ સમગ્ર રાજકીય ઉથલપાથલમાં સંખ્યાઓનો ખેલ મહત્વપૂર્ણ છે. ઉદ્ધવ ઠાકરે જૂથ સામે બળવો કરનારા 6 સાંસદો પાર્ટીના કુલ લોકસભા ક્ષમતા (9 સાંસદો)ના બરાબર બે તૃતીયાંશ ભાગનું પ્રતિનિધિત્વ કરે છે. પક્ષપલટા વિરોધી કાયદા હેઠળ, જો કોઈ પક્ષના બે તૃતીયાંશ સભ્યપદ બીજા પક્ષમાં ભળી જાય છે, તો તેમનું સભ્યપદ રદ થતું નથી. આ નિયમ આ સાંસદોને ગેરલાયક ઠેરવ્યા વિના કાયદેસર રીતે બીજા પક્ષમાં જોડાવાની મંજૂરી આપે છે.
શિવસેનામાં આ આંતરિક ઝઘડો જૂન 2022માં શરૂ થયો હતો, જ્યારે DyCM એકનાથ શિંદેએ તત્કાલીન CM ઉદ્ધવ ઠાકરે સામે ખુલ્લેઆમ બળવો કર્યો હતો. તેના પરિણામે મહારાષ્ટ્રમાં મહા વિકાસ આઘાડી (MVA)ની સરકાર પડી ભાંગી હતી.
ત્યાર પછી, ફેબ્રુઆરી 2023માં, ચૂંટણી પંચે DyCM એકનાથ શિંદેના જૂથને અસલી શિવસેના તરીકે માન્યતા આપી અને પક્ષનું પ્રખ્યાત ‘ધનુષ્ય અને તીર’નું ચૂંટણી ચિહ્ન પણ ફાળવ્યું. જ્યારે, ઉદ્ધવ ઠાકરેના જૂથનું નામ ‘શિવસેના (UBT)’ રાખવામાં આવ્યું. ત્યારથી, બંને જૂથો પક્ષના સ્થાપક બાળાસાહેબ ઠાકરેના રાજકીય અને વૈચારિક વારસાનો દાવો કરવા માટે સ્પર્ધા કરી રહ્યા છે.