મહારાષ્ટ્રના DyCM અને NCP અધ્યક્ષ અજિત પવારે મોટું નિવેદન આપ્યું છે. તેમણે કહ્યું કે, સમાજને પરિવારોમાં તિરાડ પડે તે ગમતી નથી. મહારાષ્ટ્રના DyCM અજિત પવારે કહ્યું કે, તેમને આનો અનુભવ થયો છે અને તેમણે પોતાની ભૂલ સ્વીકારી લીધી છે. DyCM અજિત પવાર લોકસભા ચૂંટણીમાં તેમની પિતરાઈ બહેન સુપ્રિયા સુલે વિરુદ્ધ તેમની પત્ની સુનેત્રાને મેદાનમાં ઉતારવાની વાત કરી રહ્યા હતા.
એક મહિના કરતાં ઓછા સમયમાં આ બીજી વખત છે, જ્યારે DyCM અજિત પવારે જાહેરમાં સ્વીકાર્યું છે કે, તેમણે તેમના કાકા શરદ પવારની પુત્રી NCP (SP) નેતા સુપ્રિયા સુલે સામે તેમની પત્નીને મેદાનમાં ઉતારીને ભૂલ કરી છે. તેમણે કહ્યું કે, રાજનીતિને ઘરની અંદર ન આવવા દેવી જોઈએ.
શુક્રવારે ગઢચિરોલી શહેરમાં NCP દ્વારા આયોજિત જન સન્માન રેલીને સંબોધતા DyCM અજિત પવારે પાર્ટીના નેતા અને રાજ્ય મંત્રી ધર્મરાવ બાબા આત્રામની પુત્રી ભાગ્યશ્રીની શરદ પવારની આગેવાની હેઠળની NCP (SP)માં જોડાવાની ટીકા કરી હતી. આગામી વિધાનસભા ચૂંટણીમાં ભાગ્યશ્રી અને તેના પિતા વચ્ચે સંભવિત હરીફાઈની અટકળો ચાલી રહી છે. DyCM અજિત પવારે કહ્યું, ‘કોઈ પણ પોતાની દીકરીને તેના પિતા કરતા વધારે પ્રેમ કરતું નથી. બેલગામમાં તેની સાથે લગ્ન કર્યા છતાં, તે (આત્રામ) ગઢચિરોલીમાં તેમની સાથે ઊભા રહ્યા અને તેમને જિલ્લા પરિષદના પ્રમુખ બનાવ્યા. હવે તમે (ભાગ્યશ્રી) તમારા જ પિતા સામે લડવા તૈયાર છો. શું આ યોગ્ય છે?’
DyCM અજિત પવારે કહ્યું, ‘તમારે તમારા પિતાને ટેકો આપવો જોઈએ અને તેમને જીતવામાં મદદ કરવી જોઈએ, કારણ કે માત્ર તેમની પાસે જ પ્રદેશનો વિકાસ કરવાની ક્ષમતા અને સંકલ્પ છે. સમાજ ક્યારેય પોતાના પરિવારને તોડવાનું સ્વીકારતો નથી.’ ભાગ્યશ્રી અને તેના પિતા વચ્ચે તેના રાજકીય પગલાને લઈને મતભેદોનો ઉલ્લેખ કરતા DyCM અજિત પવારે કહ્યું, ‘તે પરિવારને તોડવા જેવું છે. સમાજને આ પસંદ નથી. મેં પણ આનો અનુભવ કર્યો છે અને મારી ભૂલ સ્વીકારી લીધી છે.’
DyCM અજિત પવારની આગેવાની હેઠળની NCPને 2024ની લોકસભા ચૂંટણીમાં કારમી હારનો સામનો કરવો પડ્યો હતો. પાર્ટીએ મહાયુતિ ગઠબંધન હેઠળ ચાર બેઠકો પર ચૂંટણી લડી હતી અને ત્રણ પર હારી હતી. આ સિવાય શરદ પવારની આગેવાની હેઠળના જૂથે 10માંથી 8 બેઠકો પર જીત મેળવી હતી. ગઢચિરોલી જિલ્લાના અહેરીના ધારાસભ્ય આત્રામે DyCM અજિત પવારને સમર્થન આપ્યું છે. DyCM અજિત પવારે કટાક્ષ કર્યો, ‘આત્રામની દીકરીએ તેના પિતા પાસેથી રાજકારણ શીખ્યું. આત્રામ રાજકારણમાં એક ખેલાડી હતા, જે હંમેશા પોતાની નજીક હાથમાં એક ચાલ (યુક્તિ) રાખતા હતા અને યોગ્ય સમયે તેને રમતા હતા.’
