યુનિફાઈડ પેમેન્ટ ઈન્ટરફેસ એટલે કે UPI દેશમાં તેમજ વિદેશમાં ધૂમ મચાવી રહ્યું છે. તેનું ઉદાહરણ બર્લિનમાં યોજાયેલી વાર્ષિક રાજદૂતોની કોન્ફરન્સમાં જોવા મળ્યું. જર્મન વિદેશ મંત્રી અન્નાલેના બેયરબોકે ઝડપી ચૂકવણી માટે UPIની પ્રશંસા કરી. બર્લિનમાં આયોજિત એમ્બેસેડર કોન્ફરન્સમાં વિદેશ મંત્રી S. જયશંકર સાથે વાત કરતા બેયરબોકે કહ્યું કે, બે વર્ષ પહેલા ભારતમાં રાજદૂત તરીકેના તેમના દિવસો યાદ છે. તેમણે કહ્યું, મેં ત્યાં લોકોને UPI દ્વારા કરિયાણાની ખરીદી કરતા જોયા છે.
ભારતના અનુભવને યાદ કરતાં બેયરબોકે કહ્યું કે, અમે બે વર્ષ પહેલા જ્યારે હું દિલ્હીમાં હતી ત્યારે પહેલીવાર મળ્યા હતા. તેમણે ભારતીય વિદેશ મંત્રીને કહ્યું, મેં દિલ્હી મેટ્રોમાં મુસાફરી કરી અને દરેક કિલોમીટરે તમારું આધુનિકીકરણ અનુભવ્યું. શેરીઓમાં લોકોને કરિયાણાની ખરીદી કરતા અને ચુકવણી કરવા માટે ડિજિટલ ઇન્સ્ટન્ટ પેમેન્ટ સિસ્ટમનો ઉપયોગ કરીને જોયા પછી હું UPIથી ખૂબ જ પ્રભાવિત થઇ છું. મેં વિચાર્યું કે જર્મનીમાં તે અશક્ય હશે, પરંતુ અમે તેને નજીકથી જોયું અને તે પછી જર્મનીમાં એક મોટી છલાંગ લગાવી છે.
મેં જોયું કે ડિજિટલાઈઝેશન સાથે ડિજિટલ પેમેન્ટ દ્વારા રસ્તા પર પેમેન્ટ કરવું શક્ય છે. કમનસીબે અમારા દૂતાવાસમાં મેં જોયું કે, અમે હજુ પણ વિઝા માટેના અરજીપત્રકો બોક્સમાં લઈ જઈએ છીએ. બેયરબોકે કહ્યું કે, આવી સ્થિતિમાં મેં વિચાર્યું કે, હું ડિજિટલ પેમેન્ટ જેવો મોટો બદલાવ નહીં કરી શકું. પરંતુ હું મારા મંત્રાલયમાં ડિજિટલાઇઝેશન કરી શકું છું.
ગયા વર્ષે જર્મનીના ટ્રાન્સપોર્ટ મિનિસ્ટર વોલ્કર વિસિંગ પણ વાયરલ વીડિયોમાં UPIથી પ્રભાવિત થયા હતા. બેંગલુરુમાં એક શેરી વિક્રેતા પાસેથી શાકભાજી ખરીદતા વિસિંગનો વીડિયો જર્મન એમ્બેસીએ ટ્વિટર પર શેર કર્યો હતો. આ સમય દરમિયાન તેમણે UPI દ્વારા પેમેન્ટ કર્યું હતું. એક્સ પોસ્ટમાં કહેવામાં આવ્યું હતું કે, ભારતની સૌથી મોટી ઉપલબ્ધિ તેની ડિજિટલ સિસ્ટમ છે. UPI દ્વારા થોડી સેકન્ડમાં સરળતાથી પેમેન્ટ કરી શકાય છે. લાખો ભારતીયો તેનો ઉપયોગ કરે છે. જર્મનીના ટ્રાન્સપોર્ટ મિનિસ્ટર UPIનો ઉપયોગ કરીને ખૂબ જ પ્રભાવિત થયા હતા.
