લોકપ્રિય પાકિસ્તાની કલાકારો ફવાદ ખાન અને માહિરા ખાનની ભારતમાં હજુ પણ ફેન ફોલોઈંગ છે. તાજેતરમાં એવી જાહેરાત કરવામાં આવી હતી કે, તેમની બ્લોકબસ્ટર હિટ ફિલ્મ ‘ધ લિજેન્ડ ઓફ મૌલા જટ્ટ’ ટૂંક સમયમાં ભારતમાં રીલિઝ થશે. આ જાહેરાત પછી મહારાષ્ટ્ર નવનિર્માણ સેના (MNS)એ ફરી એકવાર પાકિસ્તાની કલાકારો અને ફિલ્મો સામે મોરચો ખોલ્યો છે. મહારાષ્ટ્ર નવનિર્માણ સેનાના નેતા અમય ખોપકરે સ્પષ્ટ કહ્યું હતું કે, ભારતમાં કોઈ પણ પાકિસ્તાની ફિલ્મને રીલિઝ થવા દેવામાં આવશે નહીં. એટલું જ નહીં, જો કોઈ પાકિસ્તાની એક્ટર ભારત આવશે તો તેની સાથે મારપીટ પણ કરવામાં આવશે.
મીડિયા સૂત્રો સાથે વાત કરતા અમય ખોપકરે આ પ્રકારનું મોટું નિવેદન આપ્યું હતું. ઈન્ટરવ્યુ દરમિયાન તેમને પાકિસ્તાનના કલાકારો સામેના જોરદાર વિરોધનું સાચું કારણ પૂછવામાં આવ્યું. આના પર અમયે કહ્યું, ‘પાકિસ્તાન દ્વારા આપણા દેશ પર સતત હુમલો કરવામાં આવે છે. ગયા અઠવાડિયે પણ એવા હુમલા થયા હતા જેમાં આપણા જવાનો શહીદ થયા હતા. આપણા દેશના ઘણા શહેરોમાં હુમલા પણ થાય છે, જ્યાં આપણા સારા પોલીસ અધિકારીઓ શહીદ થાય છે. આવી સ્થિતિમાં પાકિસ્તાનની તરફથી આ પ્રકારની કળાની શી જરૂર છે? શું આપણા દેશમાં કલાકારો નથી? શું અહીં ફિલ્મો બનતી નથી? શા માટે આપણને પાકિસ્તાનના કલાકારોની જરૂર છે?
અમય ખોપકરે વધુમાં કહ્યું હતું કે, ‘મુંબઈમાં થયેલા આતંકવાદી હુમલામાં જીવ ગુમાવનારા પોલીસ અધિકારીઓના ઘરે TV ચાલુ હશે ત્યારે શું તેઓ આ પાકિસ્તાની કલાકારોના શો જોશે? જેના કારણે આપણા જવાનો અને પોલીસ અધિકારીઓ શહીદ થયા હતા. અમને તેમના કલાકારો જોઈતા નથી. અમે અહીં પાકિસ્તાનના કોઈ કલાકાર કે ફિલ્મને રીલિઝ થવા દઈશું નહીં. અમારો પક્ષ મહારાષ્ટ્ર પૂરતો સીમિત છે, પરંતુ હું અન્ય રાજ્યોને પણ કહું છું કે, તેઓ કોઈ પણ પાકિસ્તાની કલાકાર કે ફિલ્મને તેમના શહેરોમાં રીલિઝ ન થવા દે અને તેનો વિરોધ કરે. અમે ચોક્કસ વિરોધ કરીશું. પાકિસ્તાની ફિલ્મો મહારાષ્ટ્રમાં તો રીલિઝ નહીં જ થાય અને આને તમારે ધમકી ગણવી જોઈએ.’
અમય ખોપકરે પણ કલા અને સંસ્કૃતિને રાજકારણથી અલગ રાખવા અંગે પોતાનો અભિપ્રાય આપ્યો હતો. તેમણે કહ્યું, ‘હું માનું છું કે કલા અને સંસ્કૃતિ અને રાજકારણ અલગ વસ્તુઓ છે. પણ જ્યારે એ જ કળા આપણા દેશ પર હુમલો કરનારાઓની હોય ત્યારે આપણને એ કળા જોઈતી નથી. આપણા માટે દેશ પ્રથમ આવે છે, પછી કલા. કલાના નામે આપણા દેશ પર હુમલો કરનારાઓને અમે સહન નહીં કરીએ. જે દિવસે પાકિસ્તાન તરફથી આપણા દેશ પર હુમલા બંધ થશે, ત્યારે વાત કરીશું. ત્યાં સુધી તો બિલકુલ નહીં.’
પાકિસ્તાની કલાકારોની સાથે અમય ખોપકરે બોલિવૂડ સ્ટાર્સને પણ ઘણું સંભળાવ્યું હતું. તેણે તે બોલિવૂડ સેલેબ્સ માટે એક સંદેશ આપ્યો, જેઓ પાકિસ્તાની કલાકારો સાથે કામ કરવાનું સમર્થન કરી રહ્યા છે. અમયે કહ્યું, ‘બોલિવૂડના લોકોને શરમ આવવી જોઈએ. આપણા દેશમાં આટલી ટેલેન્ટ છે તો પછી બહારથી ખાસ કરીને પાકિસ્તાનમાંથી કલાકારો લાવવાની શું જરૂર છે? તમે ભલે ગમે તેટલી કોશિશ કરી લો, અમે કોઈ પણ પાકિસ્તાની કલાકારને અહીં આવીને પરફોર્મ કરવા કે ફિલ્મો બતાવવા નહીં દઈએ. અત્યારે એવી વાતો ચાલી રહી છે કે, પાકિસ્તાની કલાકારો અહીં આવીને પ્રમોટ કરશે. તેથી હું તેમને કહેવા માંગુ છું કે, એવું વિચારશો પણ નહીં. પ્રમોશન વિશે વિચારશો પણ નહીં, નહીં તો તમને માર પડશે. હાથ-પગ તોડી નાંખવામાં આવશે.’
2016માં ઉરી આતંકી હુમલા પછી પાકિસ્તાની કલાકારો પર ભારતમાં કામ કરવા પર પ્રતિબંધ લગાવી દેવામાં આવ્યો હતો. ‘સુરક્ષા’ અને ‘દેશભક્તિ’નો ઉલ્લેખ કરીને ભારતીય મોશન પિક્ચર પ્રોડ્યુસર્સ એસોસિએશને એક નિયમ બનાવ્યો હતો કે, તેઓ સરહદ પારની પ્રતિભાઓને ભારતમાં કામ કરવા દેશે નહીં. જે પછી ફવાદ ખાન, માહિરા ખાન, અલી ઝફર અને રાહત ફતેહ અલી ખાન જેવા કલાકારો બોલિવૂડમાં કામ કરતા જોવા મળ્યા ન હતા.
ઓક્ટોબર 2023માં, બોમ્બે હાઈકોર્ટે પ્રતિબંધ ઉઠાવી લીધો અને તેને ‘સાંસ્કૃતિક સંવાદિતા, એકતા અને શાંતિ માટે પ્રતિકૂળ’ ગણાવ્યો. કોર્ટે એમ પણ કહ્યું કે વિદેશીઓ, ખાસ કરીને પડોશી દેશોના નાગરિકોનો વિરોધ કરવો એ દેશભક્તિ દર્શાવતું નથી. કોર્ટના નિર્ણય પછી પાકિસ્તાની કલાકારો માટે ભારતીય ફિલ્મોમાં કામ કરવાના દરવાજા ખુલી ગયા છે. આને ધ્યાનમાં રાખીને, ઝી જીંદગીએ ભારતમાં ફિલ્મ ‘ધ લિજેન્ડ ઓફ મૌલા જટ્ટ’ રીલિઝ કરવાની જાહેરાત કરી હતી. તેની રીલિઝ ડેટ 3 ઓક્ટોબર નક્કી કરવામાં આવી છે.
