સુપ્રીમ કોર્ટે પટના હાઈકોર્ટના એક નિવેદનને ‘અતિ વાંધાજનક’ ગણાવ્યું છે. પટના હાઈકોર્ટે કહ્યું હતું કે, વિધવાને મેક-અપ કરવાની જરૂર નથી હોતી. સુપ્રીમ કોર્ટે કહ્યું છે કે, હાઈકોર્ટની આ ટિપ્પણી પર સવાલો ઉભા થઈ શકે છે. આ કેસમાં 7 આરોપીઓએ સુપ્રીમ કોર્ટમાં અપીલ કરી હતી. આ સાતેયને સંપત્તિ વિવાદમાં એક મહિલાના અપહરણ અને હત્યાના કેસમાં પટના હાઈકોર્ટે દોષિત ઠેરવ્યા હતા.
મીડિયા સૂત્રોના અહેવાલ મુજબ, સુપ્રીમ કોર્ટે તમામ સાત આરોપીઓને નિર્દોષ જાહેર કર્યા છે. કોર્ટે કહ્યું કે, આ મામલામાં અન્ય પક્ષની વાર્તા ખૂબ જ ‘અસમાન’ છે.
હકીકતમાં, આ કેસના આરોપી પક્ષે કહ્યું કે, મૃતક મહિલા જે ઘરમાં હત્યા થઈ હોવાનું કહેવાય છે તે ઘરમાં રહેતી ન હતી. કોર્ટમાં કેસ સાથે જોડાયેલા સાક્ષીઓએ કોર્ટને જણાવ્યું કે ઘટના સમયે મહિલા એક જ ઘરમાં રહેતી હતી. તપાસ દરમિયાન પોલીસને ઘરમાંથી મેકઅપની વસ્તુઓ મળી આવી હતી. અને મકાનના આ જ ભાગમાં અન્ય એક મહિલા રહેતી હોવાનું પણ બહાર આવ્યું હતું, જે વિધવા હતી.
પટના હાઈકોર્ટે તેની નોંધ લીધી હતી. પરંતુ તેણે એમ પણ કહ્યું કે, મેક-અપની વસ્તુઓ અન્ય સ્ત્રીની હોઈ શકે નહીં, કારણ કે તે વિધવા હતી અને વિધવાને મેક-અપની જરૂર નથી હોતી અને આથી મૃતક મહિલા એક જ મકાનમાં રહેતી હોવાનું પુરવાર થયું છે.
સુપ્રીમ કોર્ટના જસ્ટિસ બેલા M. ત્રિવેદી અને જસ્ટિસ સતીશ ચંદ્ર શર્માની ખંડપીઠે હાઈકોર્ટના આ નિવેદન સામે વાંધો ઉઠાવ્યો હતો. તેમણે કહ્યું, ‘અમારા મતે, હાઈકોર્ટની ટિપ્પણીને કાયદેસર રીતે સ્વીકારી શકાય નહીં. ઉપરાંત, આ પણ અત્યંત વાંધાજનક છે. આવી વ્યાપક ટિપ્પણીઓ કોર્ટ પાસેથી અપેક્ષિત સંવેદનશીલતા અને તટસ્થતાને અનુરૂપ નથી. ખાસ કરીને જ્યારે રેકોર્ડ પરના કોઈપણ પુરાવા દ્વારા આ સાબિત થયું નથી.’
મીડિયા સૂત્રો પાસેથી પ્રાપ્ત થતી માહિતી અનુસાર, આ મામલો ઓગસ્ટ 1985નો છે. ઘટના મુંગેર જિલ્લાની છે. કથિત રીતે મહિલાના પિતાના ઘર પર કબજો કરવા માટે તેમનું અપહરણ કરવામાં આવ્યું હતું. ત્યાર પછી તેની હત્યા કરવામાં આવી હતી. આ કેસમાં હાઈકોર્ટે 5 લોકોને દોષિત ઠેરવ્યા હતા અને અન્ય બે સહ આરોપીઓને નિર્દોષ છોડી મુકવાના નિર્ણયને ફગાવી દીધો હતો. આ બંનેને અગાઉ ટ્રાયલ કોર્ટે તમામ આરોપોમાંથી મુક્ત કર્યા હતા. જેમાં આરોપીઓએ જણાવ્યું હતું કે, તેમના પર ખોટો આરોપ લગાવવામાં આવી રહ્યો છે અને જ્યાંથી મહિલાનું અપહરણ થયું હોવાની વાત કરવામાં આવી રહી છે તે જગ્યાએ મહિલા રહેતી જ ન હતી.
