IPL ખેલાડીઓની હરાજીની તારીખ નજીક આવી ગઈ છે. આ માટે વિશ્વના 1574 ખેલાડીઓએ તેમના નામ નોંધાવ્યા છે, ચાલો જાણીએ કે ભારતના સરફરાઝ ખાન, પૃથ્વી શો જેવા ખેલાડીઓએ તેમની બેઝ પ્રાઈસ શું નક્કી કરી છે.
IPL ખેલાડીઓની હરાજીની તારીખ આવી ગઈ છે. જે 24 અને 25 નવેમ્બરે સાઉદી અરેબિયાના જેદ્દાહમાં યોજાશે. આ માટે વિશ્વના 1574 ખેલાડીઓએ પોતાના નામની નોંધણી કરાવી છે. જેમાંથી 1165 ભારતીયો છે. ખેલાડીઓની યાદી જાહેર થયા પછી બેઝ પ્રાઈસને લઈને ચર્ચા થઈ રહી છે. ટીમ ઈન્ડિયા તરફથી રમી રહેલા રિષભ પંત, KL રાહુલ, શ્રેયસ અય્યર જેવા મોટાભાગના ખેલાડીઓએ તેમની બેઝ પ્રાઈસ 2 કરોડ રૂપિયા રાખી છે. ચાલો અમે તમને જણાવીએ કે, સરફરાઝ ખાન, પૃથ્વી શો જેવા ખેલાડીઓએ તેમની બેઝ પ્રાઈસ શું નક્કી કરી છે.
24-25 નવેમ્બરના રોજ યોજાનારી ઈન્ડિયન પ્રીમિયર લીગની આ હરાજીમાં લગભગ 200 ખેલાડીઓ પર બોલી લગાવવામાં આવી શકે છે. આ કારણથી તેને IPL મેગા ઓક્શન પણ કહેવામાં આવી રહ્યું છે. મીડિયા સૂત્રો પાસેથી પ્રાપ્ત થતી માહિતી અનુસાર, આ હરાજી માટે રીષભ પંત, KL રાહુલ, શ્રેયસ અય્યર, રવિચંદ્રન અશ્વિન, યુઝવેન્દ્ર ચહલ, મોહમ્મદ શમીની કિંમત 2 કરોડ રૂપિયા નક્કી કરવામાં આવી છે. 2 કરોડની બેઝ પ્રાઈસ લિસ્ટમાં ખલીલ અહેમદ, દીપક ચહર, વેંકટેશ ઐયર, અવેશ ખાન, ઈશાન કિશન, મુકેશ કુમાર, ભુવનેશ્વર કુમાર, પ્રસિદ્ધ કૃષ્ણ, T. નટરાજન, દેવદત્ત પડિકલ, કૃણાલ પંડ્યા, હર્ષલ પટેલ, અર્શદીપ સિંહ, વોશિંગ્ટન સુંદર, શાર્દુલ ઠાકુર, મોહમ્મદ સિરાજ, ઉમેશ યાદવનો સમાવેશ થાય છે.
બેંગલુરુ ટેસ્ટમાં 150 રનની ઇનિંગ રમનાર સરફરાઝ ખાને તેની બેઝ પ્રાઇસ 75 લાખ રૂપિયા નક્કી કરી છે. સરફરાઝ છેલ્લી હરાજીમાં અનસોલ્ડ રહ્યો હતો. પૃથ્વી શૉએ પણ તેની બેઝ પ્રાઈસ 75 લાખ રૂપિયા રાખી છે. પૃથ્વી ખરાબ ફોર્મના કારણે રણજી ટીમની બહાર છે. છેલ્લી હરાજીમાં સૌથી મોંઘા ખેલાડી રહેલા મિચેલ સ્ટાર્કે તેની બેઝ પ્રાઈસ 2 કરોડ રૂપિયા રાખી છે. IPL 2024 માટે કોલકાતા નાઈટ રાઈડર્સે મિશેલ સ્ટાર્કને 24.75 કરોડ રૂપિયામાં ખરીદ્યો હતો.
IPL ઓક્શનમાં ભાગ લેનારા ખેલાડીઓમાંથી 320 કેપ્ડ અને 1224 અનકેપ્ડ છે. સૌથી વધુ 48 કેપ્ડ ખેલાડીઓ ભારતના છે. IPL 2025 માટે 10 ટીમોએ 46 ખેલાડીઓને રિટેન કર્યા છે. બાકીના ખેલાડીઓને હરાજી દ્વારા ટીમમાં સામેલ કરવામાં આવશે. એક ટીમમાં વધુમાં વધુ 25 ખેલાડીઓ હોઈ શકે છે.
