પોતાની નિવૃત્તિના થોડા દિવસો પહેલા જ CJI DY ચંદ્રચુડે એક મોટો નિર્ણય લીધો છે. ચીફ જસ્ટિસ ઓફ ઈન્ડિયાએ તેમની નિવૃત્તિ પહેલા સુપ્રીમ કોર્ટમાં ઉનાળુ વેકેશન સમાપ્ત કરી દીધું છે. તેમણે કહ્યું કે હવે માત્ર આંશિક કોર્ટ કામકાજના દિવસો રહેશે.
આ નવો નિયમ તાત્કાલિક અસરથી અમલમાં આવશે. વર્ષ 2025ના ન્યાયિક કેલેન્ડરમાં ઉનાળાના વિરામને ‘આંશિક કાર્યકારી દિવસ’ તરીકે નિયુક્ત કરવામાં આવ્યો છે. સુધારેલા નિયમો મુજબ, આંશિક કામકાજના દિવસો 26 મે, 2025થી શરૂ થશે અને સંપૂર્ણ કામકાજના દિવસો 14 જુલાઈ, 2025થી શરૂ થશે.
સુપ્રીમ કોર્ટ આ બે સત્રો માટે બેસશે, પ્રથમ સત્ર આંશિક કામકાજના દિવસો સાથે શરૂ થશે, જે શિયાળાના વિરામના આગલા દિવસે સમાપ્ત થશે. શિયાળુ વેકેશનના અંતથી બીજું સત્ર શરૂ થશે. આ દરમિયાન, આંશિક કામકાજના દિવસોનો સમયગાળો CJI દ્વારા નક્કી કરવામાં આવશે, જેઓ આ સમયગાળા દરમિયાન કેસોની સુનાવણી માટે એક અથવા વધુ ન્યાયાધીશોની નિમણૂક પણ કરશે. આ ન્યાયાધીશો પ્રવેશ સંબંધિત તમામ કેસો, નોટિસ કેસો, નિયમિત કેસો અથવા તાકીદના કેસો પર વિચારણા કરશે.
અત્રે ઉલ્લેખનીય છે કે, CJI DY ચંદ્રચુડ, જેમણે 9 નવેમ્બર, 2022ના રોજ ચાર્જ સંભાળ્યો હતો, તેઓ 10 નવેમ્બરે નિવૃત્ત થશે. જસ્ટિસ સંજીવ ખન્ના, હાલમાં સર્વોચ્ચ અદાલતના સૌથી વરિષ્ઠ ન્યાયાધીશ છે, તેઓ ભારતના આગામી મુખ્ય ન્યાયાધીશ હશે અને તેઓ 11 નવેમ્બરે ચાર્જ સંભાળશે.
જ્યારે, અન્ય એક મોટા નિર્ણયમાં, સુપ્રીમ કોર્ટની બંધારણીય બેન્ચે ગુરુવારે કહ્યું કે, સરકારી નોકરીઓ માટે ભરતીના નિયમોને વચ્ચેથી બદલી શકાય નહીં. કોર્ટે પોતાના ચુકાદામાં એમ પણ કહ્યું કે, સરકારી નોકરીઓ માટે પસંદગીના નિયમો ભરતી પ્રક્રિયા શરૂ થાય તે પહેલા નક્કી કરી લેવા જોઈએ.
સુપ્રીમ કોર્ટે કહ્યું કે, સરકારી નોકરીઓમાં પસંદગીના નિયમો મધ્યમાં અથવા ભરતી પ્રક્રિયા શરૂ થયા પછી બદલી શકાય નહીં, ત્યાં સુધી કે તેવું કરવાનું નક્કી ન કરવામાં આવ્યું હોય. CJI DY ચંદ્રચુડની આગેવાની હેઠળની પાંચ જજોની બેન્ચે આ કેસમાં ચુકાદો આપ્યો હતો.
