UPI અને RuPay ડેબિટ કાર્ડ દ્વારા થતા વ્યવહારો પર ટૂંક સમયમાં જ શુલ્ક લાગી શકે છે. આનો અર્થ એ થયો કે હવે UPI કરવું મફત નહીં હોય, તમારે તેના માટે અલગથી ચૂકવણી પણ કરવી પડી શકે છે. હકીકતમાં, એક મીડિયા રિપોર્ટ અનુસાર, સરકાર યુનિફાઇડ પેમેન્ટ્સ ઇન્ટરફેસ (UPI) અને RuPay ડેબિટ કાર્ડ દ્વારા કરવામાં આવેલા વ્યવહારો પર વેપારી શુલ્ક પાછા લાવવાના પ્રસ્તાવનું મૂલ્યાંકન કરી રહી છે. જો આવું થશે તો ડિજિટલ પેમેન્ટ મોંઘુ થઈ જશે.
મીડિયા સૂત્રોના અહેવાલ મુજબ, સરકાર આ વ્યવહારો પર વેપારી ફી લાદવાની તૈયારી કરી રહી છે. અહીં તમને જણાવી દઈએ કે, ડિજિટલ પેમેન્ટ ઉદ્યોગમાં, મર્ચન્ટ ડિસ્કાઉન્ટ રેટ (MDR)એ રકમ છે જે વેપારી અથવા દુકાનદારે ચુકવણી સેવા શરૂ કરવા માટે ચૂકવવી પડે છે. આ ફી સરકારે વર્ષ 2022માં માફ કરી હતી. હવે સમાચાર એ છે કે, સરકાર ફરીથી તેને લાગુ કરવા પર વિચાર કરી શકે છે. હાલમાં, નેશનલ પેમેન્ટ્સ કોર્પોરેશન ઓફ ઈન્ડિયા (NPCI) દ્વારા સુવિધા આપવામાં આવતી UPI અને RuPay ડેબિટ કાર્ડ ચુકવણીઓ પર કોઈ MDR લાગુ પડતો નથી.
મીડિયા સૂત્રો પાસેથી પ્રાપ્ત એક અહેવાલમાં બેંકરનો ઉલ્લેખ કરીને કહેવામાં આવ્યું છે કે, મોટા વેપારીઓ માટે UPI વ્યવહારો પર MDR ફરીથી લાદવાની ઔપચારિક વિનંતી બેંકિંગ ઉદ્યોગ દ્વારા કેન્દ્ર સરકારને સુપરત કરવામાં આવી છે અને સંબંધિત વિભાગો તેની સમીક્ષા કરી રહ્યા છે. આ દરખાસ્ત મુજબ, 40 લાખ રૂપિયાથી વધુ વાર્ષિક ટર્નઓવર ધરાવતા વેપારીઓ માટે તેમના GST ફાઇલિંગના આધારે MDR ફરીથી લાગુ કરી શકાય છે. સરકાર UPI માટે એક ટાયર્ડ પ્રાઇસિંગ મોડેલ પર પણ વિચાર કરી શકે છે, જ્યાં મોટા વેપારીઓ વધુ ફી ચૂકવશે, જ્યારે નાના વ્યવસાયો ઓછી ફી ચૂકવશે. રિપોર્ટમાં એવું જણાવાયું છે કે, 40 લાખ રૂપિયાથી ઓછું વાર્ષિક ટર્નઓવર ધરાવતા વેપારીઓ માટે UPI ચુકવણી મફત રહેશે.
નેશનલ પેમેન્ટ્સ કોર્પોરેશન ઓફ ઈન્ડિયા (NPCI)ના ડેટા અનુસાર, ફેબ્રુઆરી 2025માં, UPIએ 16.11 બિલિયન વ્યવહારો રેકોર્ડ કર્યા, જે લગભગ 22 ટ્રિલિયન રૂપિયાના હતા. જાન્યુઆરીમાં કુલ વ્યવહારો 16.99 અબજ થયા હતા.