ઓપરેશન સિંદૂરની સફળતા પછી, PM નરેન્દ્ર મોદી પહેલી વાર ગુજરાત આવી રહ્યા છે. PM મોદી 26 અને 27 મેના રોજ ગુજરાતમાં રહેશે. ગુજરાતની બે દિવસીય મુલાકાત દરમિયાન, PM મોદી વડોદરા, દાહોદ, ભૂજ, અમદાવાદ અને ગાંધીનગરમાં હાજર રહેશે. આ તમામ સ્થળોએ PM મોદીના સ્વાગત માટે ખાસ તૈયારીઓ કરવામાં આવી રહી છે. PM મોદી ત્રણ જાહેર સભાઓને પણ સંબોધિત કરશે. આ સાથે, PM મોદી અનેક વિકાસ કાર્યોનો શિલાન્યાસ અને ઉદ્ઘાટન પણ કરશે.
PM મોદી 26 મેના રોજ સવારે 10 વાગ્યે વડોદરા પહોંચશે. વડોદરામાં PM મોદીનું ભવ્ય સ્વાગત કરવામાં આવશે, ત્યારપછી PM મોદી સવારે 11 વાગ્યે દાહોદ પહોંચશે. PM મોદી બપોરે ભૂજ જવા રવાના થશે. દાહોદ અને ભુજમાં PM મોદી માટે સ્વાગત કાર્યક્રમનું આયોજન કરવામાં આવ્યું છે, બંને સ્થળોએ PM મોદી જાહેર સભાને સંબોધિત કરશે અને ઘણા વિકાસ કાર્યોનું ઉદ્ઘાટન અને શિલાન્યાસ કરશે.
PM મોદી 26 મેના રોજ સાંજે અમદાવાદ પહોંચશે. અમદાવાદમાં PM મોદીના સ્વાગત માટે એક ભવ્ય રોડ શોનું આયોજન કરવામાં આવ્યું છે, ત્યારપછી PM મોદી ગાંધીનગરમાં રાજભવન પહોંચશે અને 27 મેના રોજ PM મોદી ગાંધીનગરમાં આયોજિત કાર્યક્રમમાં હાજર રહેશે અને વિવિધ વિકાસ કાર્યોનું ઉદ્ઘાટન અને શિલાન્યાસ કરશે.
ઓપરેશન સિંદૂર પછી, PM મોદી પહેલી વાર ગુજરાત અને વડોદરા પહોંચી રહ્યા છે. જેને ધ્યાનમાં રાખીને, સવારે 10 વાગ્યે PM મોદીનો રોડ શો યોજાઈ રહ્યો છે. PM મોદીનું સ્વાગત કરવા માટે મહિલા કાર્યકરો અને અધિકારીઓ હાજર રહેશે. મહિલાઓને લાલ સાડી પહેરીને અને માથામાં કપાળના ભાગે સિંદૂર લગાવીને PMનું સ્વાગત કરવા માટે હાજર રહેવા વિનંતી કરવામાં આવી છે. વડોદરામાં સ્વાગત કાર્યક્રમ પછી, PM મોદી દાહોદ જવા રવાના થશે. સવારે 11 વાગ્યે દાહોદ પહોંચ્યા પછી, PM મોદીનું જાહેર સભા સ્થળ સુધી ભવ્ય સ્વાગત કરવામાં આવશે. PM મોદી દાહોદમાં એક જાહેર સભાને સંબોધિત કરશે.
દાહોદથી, PM મોદી રાજ્ય સરકારના વિવિધ વિભાગોના રૂ. 24,000 કરોડથી વધુના વિકાસ કાર્યોનું ઉદ્ઘાટન અને શિલાન્યાસ કરશે, જેમાં રૂ. 21,405 કરોડના ખર્ચે બનેલ લોકો મેન્યુફેક્ચરિંગ શોપ – રોલિંગ સ્ટોક વર્કશોપનું ઉદ્ઘાટન અને રેલ્વે સંબંધિત વિકાસ કાર્યોનો સમાવેશ થાય છે.
દાહોદમાં, PM મોદી પ્રથમ 9000 HP લોકોમોટિવ એન્જિન દેશને સમર્પિત કરશે. દાહોદમાં બનેલ રેલ્વે ઉત્પાદન એકમ દસ હજાર લોકોને રોજગારી પૂરી પાડશે તેવી અપેક્ષા છે. દાહોદમાં ઉત્પાદિત લોકોમોટિવ એન્જિન 4600 ટન કાર્ગો વહન કરી શકશે. આગામી 10 વર્ષમાં લગભગ 1200 એન્જિન બનાવવાનું લક્ષ્ય રાખવામાં આવ્યું છે.
આ ઉપરાંત, PM મોદી 181 કરોડ રૂપિયાની પાણી વિભાગની ચાર યોજનાઓનું ઉદ્ઘાટન કરશે, જેનો લાભ 193 ગામોને મળશે. આ સાથે, PM નરેન્દ્ર મોદી દાહોદ સ્માર્ટ સિટી હેઠળ દાહોદમાં મ્યુનિસિપલ બિલ્ડીંગ, આદિવાસી સંગ્રહાલય સહિત જાહેર સુવિધાઓ અને જન કલ્યાણ માટે 233 કરોડ રૂપિયાના વિકાસ કાર્યો લોકોને સમર્પિત કરશે. 53 કરોડના ખર્ચે બનેલા પોલીસ આવાસના કામોનું ઉદ્ઘાટન કરશે.
PM નરેન્દ્ર મોદી 26 મેના રોજ બપોરે 2 વાગ્યે ગુજરાતના કચ્છ જિલ્લાના ભૂજ પહોંચશે. ભુજમાં PM મોદીના રોડ શો માટે પણ તૈયારીઓ ચાલી રહી છે. રોડ શો પછી, PM મોદી જાહેર સભાને સંબોધિત કરશે. આ દરમિયાન, PM મોદી 53,414 કરોડ રૂપિયાના કુલ 33 વિકાસ કાર્યોનું ઉદ્ઘાટન અને શિલાન્યાસ કરશે, જેમાં ઉર્જા અને પેટ્રોકેમિકલ્સ વિભાગ, માર્ગ અને ગૃહનિર્માણ વિભાગ, પાણી વિભાગ, પવિત્ર યાત્રાધામ વિકાસ બોર્ડ, પાવર ગ્રીડ અને દીનદયાળ પોર્ટ ઓથોરિટીનો સમાવેશ થાય છે. ભુજમાં રોડ શો અને જાહેર સભા પછી, પીએમ મોદી અમદાવાદ જવા રવાના થશે.
અમદાવાદ એરપોર્ટથી ઇન્દિરા બ્રિજ સર્કલ સુધી PM મોદીના સ્વાગત માટે ભવ્ય તૈયારીઓ કરવામાં આવી રહી છે. આ બે કિલોમીટરના રૂટ દરમિયાન PM મોદી રોડ શો કરશે. PM મોદીના સ્વાગત માટે અલગ અલગ કટઆઉટ અને 15થી વધુ સ્ટેજ બનાવવામાં આવ્યા છે. PM મોદીના કટઆઉટ સાથે સેનાના જવાનોના ફોટા પણ છે.
રોડ શોના રૂટ પર LED, બ્રહ્મોસ મિસાઇલ, S400 ડિફેન્સ સિસ્ટમ, ફાઇટર પ્લેનના કટઆઉટ લગાવવામાં આવ્યા છે. ઓપરેશન સિંદૂરના કટઆઉટ સાથે સિંદૂર ધરાવતો બાઉલ રાખવામાં આવ્યો છે. આખા રસ્તા પર ત્રિરંગાના ધ્વજ ફરકાવવામાં આવ્યા છે અને રસ્તાની બંને બાજુ ત્રિરંગી પટ્ટાઓ લગાવવામાં આવ્યા છે. અમદાવાદમાં રોડ શો પછી, PM મોદી ગાંધીનગરમાં રાજભવન પહોંચશે અને દિવસના તમામ સત્તાવાર કાર્યક્રમો સમાપ્ત થશે.
27 મેના રોજ, PM મોદી ગાંધીનગરના મહાત્મા મંદિરથી 5,536 કરોડ રૂપિયાના વિકાસ કાર્યોનું ઉદ્ઘાટન અને શિલાન્યાસ કરશે. જેમાં તેઓ 1,006 કરોડ રૂપિયાના ખર્ચે PMAY હેઠળ બનેલા 22,055 મકાનોનું ઉદ્ઘાટન કરશે અને 1,000 કરોડ રૂપિયાના ખર્ચે બનેલા સાબરમતી રિવરફ્રન્ટ ફેઝ-3નો શિલાન્યાસ કરશે.
પ્રધાનમંત્રી સુવર્ણ જયંતિ મુખ્યમંત્રી શહેરી વિકાસ યોજના હેઠળ શહેરી સંસ્થાઓને 3,300 કરોડ રૂપિયાના ચેકનું વિતરણ કરશે. પ્રધાનમંત્રી જળ સંસાધન વિભાગ હેઠળ 888 કરોડ રૂપિયાના ખર્ચે બનનારી થરાદ ધાનેરા પાઇપલાઇન અને 678 કરોડ રૂપિયાના ખર્ચે બનનારી દિયોદર લાખાણી પાઇપલાઇનનો શિલાન્યાસ પણ કરશે.