‘કૌન બનેગા કરોડપતિ’ની નવી સીઝન, કેબીસી 17, ગઈકાલથી શરૂ થઈ છે. આ શો હંમેશની જેમ બોલિવૂડના દિગ્ગજ અભિનેતા અમિતાભ બચ્ચન હોસ્ટ કરશે. સોની લિવ પર ઓટીટી પ્લે પ્રીમિયર દ્વારા ગઈકાલે રાતે 12 ઓગસ્ટ, 2025ના રોજ તેનું ઓટીટી પ્રીમિયર થયું. આ સીઝનમાં દર્શકોને અમિતાભ બચ્ચનનો એક નવો અંદાજ જોવા મળ્યો.
અમિતાભ બચ્ચનનો નવો અવતાર
આ સિઝનના પ્રોમોમાં અમિતાભ બચ્ચન બે અલગ અલગ અવતારમાં જોવા મળ્યા છે. એક અવતારમાં તેઓ ફંકી અને એનર્જેટિક લૂકમાં છે, જ્યારે બીજામાં ક્લાસી અને રિફાઇન્ડ. આ નવી શૈલી તેમના ટ્રેડમાર્ક સ્ટાઇલને આધુનિક ટચ આપે છે. તેમના નવા ડાયલોગ “અકલ સાથે અકડ” એ ફેન્સ વચ્ચે પહેલેથી જ લોકપ્રિયતા મેળવી છે. અમિતાભ બચ્ચને પહેલા એપિસોડમાં ફંકી પ્રિન્ટેડ સૂટ અને કાળા પેન્ટ પહેર્યા છે. કેટલાક ફેન્સે તો તેમના આ આઉટફિટની સરખામણી ‘તારક મહેતા કા ઉલ્ટા ચશ્મા’ના જેઠાલાલના અનોખા ફેશન સાથે પણ કરી છે.
કેબીસી: માત્ર એક ગેમ શો નહીં
ઈન્ડિયા ટીવીના અહેવાલ મુજબ, ‘કૌન બનેગા કરોડપતિ’એ તેની 16 સફળ સિઝનમાં 1368 એપિસોડ દ્વારા 2143 સ્પર્ધકોને ભાગ લેવાનો મોકો આપ્યો છે. ઘણા સ્પર્ધકો લાખો અને કરોડો રૂપિયા જીતીને ઘરે ગયા છે, જ્યારે અન્ય લોકોએ શોમાં ભાગ લઈને ખુશી અને ઓળખ મેળવી છે. આ શો ઘણા લોકો માટે માત્ર એક ગેમ શો કરતાં ઘણું વધારે બની રહ્યો છે.
ક્યાં અને ક્યારે જોવું
‘કૌન બનેગા કરોડપતિ’ની 17મી સિઝન 11 ઓગસ્ટ, 2025થી સોમવારથી શુક્રવાર રાત્રે 9 વાગ્યે સોની એન્ટરટેઈનમેન્ટ ટેલિવિઝન પર પ્રસારિત થશે. દર્શકો આ એપિસોડ્સને SonyLIV પર પણ સ્ટ્રીમ કરી શકે છે. સલમાન ખાન હોસ્ટ કરશે તેવી અફવાઓ ખોટી સાબિત થઈ છે અને ફરી એકવાર બિગ બી આ લોકપ્રિય ક્વિઝ શોનું સંચાલન કરવા માટે તૈયાર છે.
